Header Ads

  • Berita Tebaru

    Lima sektor besai udah dirintai dikena ngenegapka TMW 2018

    Datuk Seri Rohani Abdul Karim
    KUCHING: Lima sektor besai ti udah dilis dalam ‘Pelan Tindakan Pembangunan Wanita Negara’ iya nya pengerai, pengelikun, ekonomi, main asal enggau pelajar deka nyadi pekara dikemerat ba pejalai pengawa Tahun Memperkasakan Wanita (TMW) 2018.

    Menteri Pemansang Orang Indu, Ruang Bilik enggau Komuniti, Datuk Seri Rohani Abdul Karim madah dikena nyapai juluk nya, disadang bisi 345 kesemua program ti dirikod Opis Menteri Pemansang Orang Indu, Ruang Bilik enggau Komuniti (KPWKM) nengah Opis Pemansang Orang Indu (JPW) ngambika dipejalai semanjai taun ba pengawa ngenegapka raban indu di renggat dunya.

    “Taja semina lima sektor ti dipilih nyadi batang pekara dikemerat ba pejalai program sepanjai taun tu, sektor bukai mega deka di asimilasikan ba pejalai program ti diperambu lalu dipejalai ngambika nyapai kesemua iya,” ku iya lebuh bejaku ba Program Randau Begulai Enggau Gerempung Ukai Dikuasa Perintah (NGO) Indu Kuching di Hotel Pullman semak ditu, malam kemari.

    Nitih ku iya, bemacham aktiviti ti diperambu dikena ngemujurka TMW 2018 tu, antara nya, pengawa ‘town hall’ begulai enggau raban indu ungkup lima kluster tadi (ekonomi, pengelikun, pengerai enggau ke bukai) ngulihka penemu, perambu enggau inisiatif pemadu baru ti ngaul komuniti semak agi, bengkel nambahka pengulih diri ngagai Orang Gawa Perintah, ‘Engagement’ begulai enggau sektor Korporat, Program ‘Boot Camp Women Entrepreneur’, program TV begulai enggau selebriti tebilang, latih motivasyen ‘Rakan Sihat’, Forum Antarabansa, ‘Anugerah Ikon Wanita Malaysia’, ‘Women Book Club’, kus ‘online’ marketing, Kempen EVAW (Eliminate Violence Against Women), Randau Mija Bulat enggau mayuh agi.

    “Enda ulih dikenggai NGO endang bisi pangku pengawa beguna endar mantu KPWKM enggau raban perintah ngasuh TMW18 tu nyadi nyata.

    “Kerejasama rat antara NGO enggau perintah endang patut bisi ba pengawa ngangkatka nama enggau penuduk raban indu ba mayuh bengkah sektor di menua tu,” ku iya.

    Berebak enggau nya ku iya, opis menteri nengah JPW komited bejalaika program pemansang kapasiti ti meri pemaik ngagai raban indu di mengeri tauka di menua pesisir.

    Antara program ti udah dipejalai di Sarawak kelebih agi ari taun 2009 nyentuk 2017 udah nunjukka statistik ti manah endar.

    “Nyentuk taun 2017 bisi 34 program enggau bala pesereta dipelaba manggai 1,000 iku udah ngulu program di baruh pejalai Opis Pemansang Indu Nengeri (PPWN) Sarawak enggau kerejasama bemacham ejensi.

    Program pemansang kapasiti ti ngaul diri iya nya pekara dagang baka DeWi (Development of Women Entrepreneurs Initiatives) enggau Program Bazar Wanita 1Malaysia.

    “Nengah Komuniti Perwani 1Malaysia, PPWN Sarawak chakah ngaul diri ba aktiviti volunteer ke alai penyampau datai ba bulan Disember 2017 iya nya manggai 1,123 raban enggau kaban iya manggai 16,435 iku,” ku iya.

    Ku iya nambah, pekara tu ngayanka pengeran perintah bejalaika program ti bisi penau meri pemaik ngagai raban diselinting.

    “Kelebih agi opis menteri nya bekerejasama enggau semua raban dikena nyapai Tahun Memperkasa Wanita 2018 tu,” ku iya.

    Nya alai ku iya, endang nyadi pengarap ba pejalai TMW 2018 tu, raban NGO enggau perintah deka ulih bekerejasama enggau rat agi dikena nyapai siti tuju ke sama iya nya ngenegapka agi raban indu, ngulihka peluang ba semua bidang lalu nadai agi tinggal. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: