Header Ads

  • Berita Tebaru

    LRS nyungkak ekonomi peranak di kandang menua tebing tasik

    Datuk Sri Fatimah Abdullah
    Tu mantu peranak di kandang menua nya ngangkatka tikas pengidup.

    MUKAH: Pengawa numbuhka Lembaga Rumbia Sarawak (LRS) deka nyungkak ekonomi komuniti di kandang menua tebing tasik.

    Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Sri Fatimah Abdullah madah pengawa ngangkatmanah iya nya ngaul pengawa betanam ti deka mantu ngangkatka pemanah tikas idup.

    “Mulong ke diatu nyadi keempat pemadu besai mansutka asil dalam industri betanam nengeri pengudah sawit, lada enggau pengawa berikan,” ku iya rambau Pengawa Bejadi Muka Aum Pengari Parti Pesaka Bumiputera Bersatu (PBB) Zon Mukah kemari.

    Kenu ku iya, endang tau nyadi ba sebarang pengawa dipejalai enggau meruan sereta profesional ngemayuh sereta nambahka kauntiti enggau kualiti aktiviti ekonomi ari mulong deka meransang agi pemansut iya ba industri nya.

    Tu ku iya nyengkaum pengawa ngemesaika makit produk bekaul mulong sekalika nengah industri keterubah tauka ti nangkanka nya.

    “90 peratus ari kandang menua endur nanam mulong di Sarawak mega diperimba bala pekebun mit,” ku iya.

    Kelimpah ari pengawa nyungkak ekonomi pedagang mit, bisi 702 peminta pekebun mit ngulihka pala tanah patut diperunding laban sida udah lama berimba.

    Ngelansa pasal parti, Fatimah meri terima kasih ngagai bala ketuai ke dulu laban udah gawa nitihka pematut nangkup peminta jeman nya.

    Bala ketuai ko iya udah nyediaka taba ungkup parti gawa nitihka pematut ubah jeman kemaya hari.

    Sama bisi mansutka jaku Kepala Menteri Datuk Patinggi Abang Johari Tun Abang Openg, datai disempulang bini iya, Datuk Patinggi Datuk Juma’ani Tun Tuanku Bujang, Sapit Kepala Menteri Datuk Amar Awang Tengah Ali Hassan, Menteri Kereja Raya Datuk Fadillah Yusof, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Menteri di Opis Kepala Menteri Datuk Talib Zulpilip, bala menteri muda sereta temuai dipebasa ke bukai. #UtusanBorneo

    No comments

    Post Top Ad