Header Ads

  • Berita Tebaru

    Lundu deka nunda sistem ngintu teda uras MBM

    Opis Kaunsil Pelilih Lundu (MDL)
    MIRI: Kaunsil Pelilih Lundu (MDL) ngembuan juluk deka nguna sistem ngintu urus enggau teda uras ke lebih menyana sereta enda ngerusak rampa menua.

    Sapit Chairman MDL Kaunsilor Abdul Razak Abdul Wahab madah, pengawa ngintu uras enggau teda uras ke bisi diatu semina nitih chara lama ba taba tugung uras.

    Taja pia, ungkup taba tugung uras ke baru ila, piak kaunsil kandang menua (PBT) enggai agi ngena chara lama tang bejalaika sistem ngintu ke lebih meruan, beresi sereta enda ngerusak rampa menua.

    Nya alai, penemuai MDL ke Miri pengelama empat hari bepun ensana endang betuju belajarka pasal sistem ngintu uras enggau teda uras ba tugung uras ari Kaunsil Mengeri Besai Miri (MBM).

    “Kitai udah lama ninga chara enggau sistem muai uras enggau teda uras ba Miri chukup manah, beresi sereta enda ngerusak rampa menua ke dipejalaika MBM, tang kitai enda nemu sereta enda kala meda pengawa nya dipejalai.

    “Nya alai, penemuai kami kitu endang deka belajarka sistem ngintu ke dikena MBM lalu kitai ngembuan juluk deka nunda nya ila,” ku Abdul Razak rambau bejaku ba pengerami licha nyerumba penemuai MDL ba bilik aum MBM ensana.

    Abdul Razak madah, taba tugung uras baru nya ila dipelabaka ngembuan 50 ekar, bela dipadah diintu Kaunsil Pelilih Bau sereta ngintu uras enggau teda uras manggai 200 tan penuh.

    Diatu taba nya bepalan ba Lundu lalu agi ba renggat Diperati Piak Pengatur Rampa Menua (EIA) ari Kaunsil Pengeraja Asal enggau Rampa Menua (NREB) sebedau disua ngagau kededua piak kaunsil kandang menua.

    Berebak enggau nya, Datuk Bandar Miri Adam Yii ke bela datai ngelaluka penatai raban MDL ti keterubah iya nemuai seraya belajar ngagai MBM, madah piak sida sedia bekunsi penemu enggau peneleba ngagai MDL bekaul enggau pengawa ngintu uras.

    Adam ba jaku iya madah, MBM nguna belanja manggai RM16 juta setaun dikena ngintu uras enggau teda uras ba Miri.

    “Ninting hari MBM ngintu urung 200 tan uras dalam menua ke digumpul ari selampur menua Miri dibuai ngagai tugung uras ke digaga ba Sibuti, tang deka dipindah ngagai palan baru ba Jalai Miri-Bintulu lalu bisi ngembuan perengka guna ke lebih moden,” ku iya.

    Nangkan nya, bisi 15 kaban delegit MDL nyereta penemu seraya belajar diuluka Abdul Razak.

    Bela bisi nyereta iya nya Chairman Komiti Pengawa Lisi, Tuju Am enggau Pengerai Rama MDL Kaunsilor Chen Chung Yee.

    Pagi tu raban nya deka nemuai ngaga taba tugung uras Miri beratika sistem ngintu uras ngambi ulih ditunda ba Lundu.#UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: