Header Ads

  • Berita Tebaru

    Mathew Ngau udah mujur ngelancharka kelas sape formal kemari

    Mathew Ngau Jau
    KUCHING: Mathew Ngau Jau, guru Sape enggau ‘Malaysia’s Living National Heritage’ udah ngelancharka kelas Sape semanjai taun ngambika mayuh agi sida ti rinduka Sape ulih dibai ngelala main asal enggau tradisi Sape komuniti Kenyah enggau Orang Ulu, ukai semina pekara gaya nebah aja.

    Kelas beraban enggau ngatika diri di Kuching, ti berengkah kena 6 Januari, dipejalaika kompeni rama menua tu,Tuyang Initiative lalu disukung Hub Innovasyen Digital TEGAS ti nyadi kaban begulai.

    Nyadi siku ti diakun komuniti ti kisi kuasa ba Sape, Mathew bansa Kenyah Ngorek ari Long Semiyang (ulu Baram), udah dituku diberi ‘Living National Heritage’ dalam taun 2015 ari Perintah Malaysia.

    Tu basa ke pemadu tinggi udah diberi ngagai palan, objek tauka utai  idup ke tebilang ti dipeda beguna endar dalam sejarah menua. Iya diatu nyadi siku ari lima iku di menua tu nerima ke basa nya.

    ““Tu keterubah endar aku gawa belalauka format kelas formal. Sebedau tu, enda meruan, nama ke diasaika aku maya nya, nya ke diajar aku. Nadai silibus ti meruan tauka tusun bayar. Tang enggau tu, gawa sejam seminggu (ungkup sebulan), aku berasai gaga ulih ngawakka jam ti chukup berega enggau mayuh nembiak ngelala pekara main asal, lagu tradisi enggau mega chara nebah.

    “Aku enggai meda orang semina belajar aja laban kereban nya manah dipeda sereta eksotik. Aku ngarapka orang mega deka belajarka pemesai reti iya, pasal lagu enggau penatai komuniti,” ku Mathew nengah penerang berita The Tuyang Initiative kemari.

    “Kami temegah ngarika orang ti ngembuan pengelandik baka Mathew. Nyaup iya enggau komuniti ngemujurka juluk iya nentuka main asal sereta tradisi Kenyah enggau Orang Ulu dikunsi enggau dunya, pia mega seni nebah enggau ngaga Sape diintu, nyengkaum komuniti sereta bela ngarika pemesai guna, ba kitai iya nyadi sebagi ari juluk kitai.

    Nyadi kompeni rama, endang patut kami nentuka nya ulih ditan ukai semina ke Mathew aja, tang mega ngagai sida ti ngemeranka seni asal ke bukai enggau komuniti ti diarika kitai dalam timpuh panjai,” ku Juvita Wan, penengkebang begulai enggau The Tuyang Initiative.

    BEKUNSI PENEMU: Mathew (duduk kiba) begulai enggau bala nembiak ba Hub Innovasyen Digital TEGAS, Kuching.
    Kelimpah ari ngajar Sape, iya mega ngarapka ulih mai nya ngagai serata menua Malaysia enggau antarabansa, Mathew begulai enggau The Tuyang Initiative mega gawa ngelangkar pengawa merindang, pengawa mandang enggau format worksyop ti mantaika pasal penyelai tradisi, seni enggau main asal Orang Ulu.

    “Taja ngemeranka penulin tradisi nya, format dikemansang deka bisi pemerindang tinggi sereta rega pelajar. Sida mega nentuka nya inklusif, ke alai pesereta ari komuniti Orang Ulu, nyengkaum raban komuniti menua pesisir.

    “Pelin tu deka keterubah endar dibantaika dalam bulan Ogos ba dua bengkah pengerami ke alai sida udah dikangau datai ngulu siti di Kuala Lumpur lalu siti agi di Hokkaido, Jepun.

    Penerang silik pasal Kelas Sape diajar Mathew Ngau Jau, tau titihka Mathew bai Facebook iya nya fb.com/MathewNgauJauSape. #UtusanBorneo

    No comments

    Post Top Ad