Header Ads

  • Berita Tebaru

    Mawan ngelala gaya sukung di Saratok, ku Karim

    Datuk Abdul Karim Rahman Hamzah
    KUCHING: Tan Sri William Mawan Ikom ke nyadi Kaban Parlimen (MP) Saratok enda kala mutuska runding deka ningkilka diri ari Barisan Nasional (BN), Ku Ketuai Kanan Parti Pesaka Bumiputera Bersatu (PBB) Datuk Abdul Karim Rahman Hamzah.

    “Iya nemu gaya sukung di Saratok lalu udah enggau nyemetak madah barang sapa ke deka ngelakuka diri ba penuduk nya meseti ngembuan sukung ari rayat.

    “Nadai guna bediri ba penuduk nya enti semina deka mantupka ‘kouta’ ke dipesetuju dalam gempung BN, tang pengujung dialahka penyakal,”ku Karim nengah surat penerang berita kemari.

    Karim ke mega Menteri Dagang Temuai, Seni, Main Asal, Nembiak enggau Lumba mansutka penemu nya nimbal ripot surat berita dulu agi ari tu ti madah Mawan mansutka jaku “Sukung ke tegap ari rayat deka nentuka pemujur chalun ke dipilih BN”.

    Mawan mega ngelalau pengawa ngelakuka diri enggau parti enda ngeruga pemaik perau BN nengah chara mambarka penyerakup ba sitak Saratok.

    Karim sepenemu enggau Mawan lalu madah ‘BN enggau PBB deka milih chalun ke ulih menang, dikedeka rayat lalu ulih mantupka pinta enggau peneka semua komuniti lalu enda ngenahka sebengkah raban aja’.

    Iya nambah, sentimen ketuai enggau kaban PBB di Saratok patut mega diperunding maya milih chalun ngarika BN di Saratok.

    Parlimen Saratok ngarika tiga sitak DUN iya nya DUN Krian ke dikuasa Ali Biju (PKR), Kabong(BN-PBB Mohd Chee Kadir)enggau Kalaka(BN-PBB Datuk Abdul Wahab Aziz).

    Karim nemu PKR udah chakah begulai enggau rayat di Saratok nyerumba pengawa bepilih ti deka datai lalu ngenataika jaku tesau enti BN milih chalun ke salah, penuduk nya tau dirampas penyakal.

    Kelebih agi enti bansa Melayu enda setujuka chalun ke dipilih, tandu Karim. #UtusanBorneo

    No comments

    Post Top Ad