Header Ads

  • Berita Tebaru

    Mensia mayuh di Julau patut nentuka pengelikun dikena nyeliahka rabie

    PUNASKA RABIES: Salang (empat kanan) nyuaka kad vaksin enggau sangkar ngagai Tr Mathew Jana dikena ngelai nutup program nya kemari.
    JULAU: Kaban Parlimen Julau Datuk Joseph Salang ngelalau mensia mayuh ditu ngambi ngibun pengelikun diri nyeliahka penyakit rabies tau nyadi.

    Ku iya madah, ba dia udah ditemu bisi ukui ngundan igi penyakit nya bulan siti tadi.

    “Kitai mega meseti nemu reti penyakit tu, kelai sakit enggau nemu pengawa ke patut digaga enti udah diketup ukui,” pia ku iya madah maya dipebasa nutup Kimpin Ngelala Penyakit Rabies di Rumah Mathew Jana, Batu Matup ditu, kemari.

    Kelimpah ari nya, Salang mega minta sida ti bisi nupi ukui nuchuk ukai sida ngena vaksin rabies sereta ngibun ukui sida enggau manah.

    Iya mega madah, nitihka tangkan Opis Pengerai, nyema diketup ukui pekara keterubah patut dikereja iya nya masu telih ngena ai abis nadai 15 minit.

    Nangkan ke nya, anang laun mai diri berubat ngagai kelinik tauka sepital ke besemak.

    “Pia mega kitai anang enda bejimat sereta kembuan penemu semua ukui baik nya ditupi tauka ukui kampar bela tau mai penyakit rabies,” ku iya madah.

    Salang mega madah, ukui ke ditemu ngundan igi penyakit rabies kena 30 Disember tu tadi ba menua nya mujur ditangkap sebedau penyakit nya ngerekai ke bukai.

    Maya meri licha ngagai mensia mayuh ba program nya, Pemesai Opis Pengerai Sarikei Dr Teh Ho Hun madah, kenyau 1 April 2016 suba, 6,042 iti kes ketup ukui bisi dirikod.

    Iya madah, urung 2,286 iku udah diberi vaksin.

    “Ari 18 iti kes rabies nyadi, 10 iku ketegal ari ukui ke ditupi.

    “Ba Julau udah ditangkan lalu ditemu positif rabies,” pia ku iya.

    Mathew Joans ari Opis Veterinar Sarikei madahka urung 1,018 iku uduk ditu enggau di Durin udah dituchuk vaksin.

    Sida ke ngempu ukui tu ku iya enda tau ngelepaska ukui sida dalam kandang 28 hari.

    Sama bela datai maya tu iya nya Pemancha Datuk Janggu Banyang, Chairman Parti Pesaka Bumiputera Bersatu (PB) pati Meluan Paulus Banyang enggau Pemesai Opis Pelilih Menua Julau Khalud Andong. #UtusanBorneo

    No comments

    Post Top Ad