Header Ads

  • Berita Tebaru

    Mensia mayuh dipinta enda nyuaka tingki sengapa ngagai orang ti enda dikelala

    Datuk Joseph Salang Gandum
    JULAU: Mensia mayuh ditu dilalau ngambika enda nyua tingki sida ngagai orang bukai ti dipadahka deka nyaup chalun ke dikerindu sida ngining bediri baka ti nyadi ba Parlimen Julau.

    Kaban Kaban Parlimen Julau Datuk Joseph Salang Gandum madah, iya bisi nerima berita madahka sekeda orang udah bejalai mupu tingki mensia mayuh ba menua nya.

    “Ari penyampau tingki ke digumpul sida, dia sida deka mandang ngagai bala pemesai Barisan Nasional (BN) chalun sida endang disukung rayat dia.

    “Nya aja batang tuju sida ngumpul tingki mensia mayuh ditu,” pia ku iya madah maya datai ngulu pengerami pemesai begulai enggau rayat ba Rumah Sabang, Rantau Limau ditu, hari Minggu tu tadi.

    Dulu agi ari nya, iya dipebasa bejadi balai mensia mayuh ke beungkus RM115,000.

    Kelimpah ari nya, Salang mega madah, Tuai Rumah anang enda ngelalau peranak rumah panjai iya ngambika enda nyua tingki ngagai orang bukai semina ketegal ngulihka duit aja.

    Ulah baka nya ku iya, berupai bendar ningkah undang-undang menua tu.

    Salang ti mega Sekretari Besai Parti Rayat Sarawak (PRS) madah, ulah ex-Kaban Parlimen Julau Datuk Sng Chee Hua ti madah ngagai mensia mayuh Menteri Besai Datuk Seri Najib Tun Razak besetujuka anak iya, Larry Sng Wei Shien bediri ba parlimen nya endang ulah ke nyelai.

    “Enti pekara tu amat nama kebuah aku enda nemu.

    “Baka ni Larry ke udah dibuai ari PRS tau bediri ba penuduk PRS enti enda dikemendar presiden parti?,” ku iya madah.

    Salang ti dikeandalka PRS ngetanka penuduk nya ungkup ke lima penggal madahka pekara nya tampak mantaika Sng enggau bala iya ngemulaka rayat dia.

    Iya madahka diri berasai nangi laban pengundi di Julau mayuh bansa Iban (98 peratus) laban enti orang ukai Dayak bediri dia tau bendar nejuka pengari bansa Dayak majak mimit ba Parlimen.

    Taja pan baka nya, Salang meri jaku terima kasih ngagai semua bala tuai rumah enggau rayat bukai ti semampai pechaya sereta ngandalka iya nyadi pengari rayat dia.

    Ba pekara bukai, iya madah, agi mayuh pengawa deka diaduka ba Parlimen Julau dia.

    Tu ku iya nyengkaum projek jalai Rantau Limau ti udah dipasukka ba Projek Jiwa Murni.

    “Tang diatu Opis Menteri Kandang Menua Enggau Menua Pesisir udah ngambi projek ngemanahka jalai nya ngena chara sida empu,” pia ku iya sambil madah Najib empu udah ngungkupka belanja dikena ngemujurka projek nya. #UtusanBorneo

    No comments

    Post Top Ad