Header Ads

  • Berita Tebaru

    MESTR ngansak penanggul sekula ti lama diputar lengkas

    BEJADI: Manyin ngelai pengawa bejadi Konference Kepala Pengajar Sarawak (Zon Tengah) 2018 di Sibu, kemari.
    SIBU: Opis Menteri Pelajar, Sains enggau Pansik Teknologi (MESTR) Sarawak ngarapka Opis Menteri Pelajar begulai enggau Opis Menteri Kereja Raya deka lengkas agi mutarka penanggul sekula ke udah luya ba nengeri tu.

    Menteri MESTR Sarawak Dato Sri Michael Manyin Jawong madah, ari 1, 454 buah penyampau sekula di Sarawak, 70.2 peratus tauka 1,020 buah ditentuka sekula lama tauka udah lama.

    Ku iya, ari 1,020 buah nya mega, 415 buah ditentuka kelalu balat udah buruk ti meseti diaduka enggau lengkas.

    “Kitai ngemeratka pengawa ngemanahka baru sekula ke udah luya tu ngambika bala nembiak belajar enggau lantang lalu bala pengajar mega nadai nanggul ngajar.

    “Sekula ke likun deka nyungkakka agi tikas pemanah pelajar,” pia ku iya madah.

    Iya mantaika jaku tu maya bejadi Konference Kepala Pengajar Sarawak (Zon Tengah) 2018 ba sebengkah hotel ditu, kemari.

    Pengawa tu bela digulu Sekretari Mendam MESTR, Datu Sudarsono Osman.

    Nambah jaku iya baru ku Manyin, ba Pelin Pemansang Malaysia Lumpar Ke-11 (RMK11), 205 buah sekula buruk deka diaduka baru.

    Kebukai 210 buah agi ku iya, deka diputarka nengah puku ke beungkus RM1 billion, baka ke diterang Menteri Besai maya mantaika bajet 2018 empai lama.

    “Tang taja pan baka nya, penyampau ngaduka baru 210 buah sekula ke balat buruk tu endang bekenaka puku ti besai,” ku iya madah baru.

    Berebak enggau tu mega, Manyin madahka pengawa ngangkatka standard Jaku English ba nengeri tu meseti diaduka enggau lengkas bepun ari jaku tu dikena ba renggat dunya baikka ba dagang tauka ba sains.

    “Nya alai, chara ti praktikal beguna amat dikena nentuka inisiatif ke digaga semua piak ke bekaul ulih datai ba tikas ti manah.

    “Perintah nengeri nengah MESTR udah belabuh ngaduka beberapa bengkah inisiatif dikena ngangkatka stindit Jaku English ba nengeri tu,” ku iya madah.

    Ku iya, tu nyengkaum bejadika Jaku English nyadi jaku ke dua dikena di Sarawak kelimpah chara ke bukai baka ngaga jaku Bahasa Malaysia enggau Jaku English ba papan pal di sekula nyengkaum ngalih Rukun Negara ngena Jaku English ba genap semua sekula di nengeri tu.

    “Tuju kitai iya nya deka nelebaka bala nembiak bekenaka Jaku English sereta nyungkakka pengerindu sida bekenaka jaku tu,” ku iya sambil madah pengeransing tu mega dikerekaika ba bala pengari rayat ngambika ngiru sekula ba menua ke dipegai bela ngemeratka jaku nya.

    Kelimpah ari nya ku Manyin, Simposium Pelajar Jaku English (SELES) mega deka diatur baru taun tu ti dipelabaka deka digaga di Miri bulan Ogos ti deka datai sepengudah keterubah iya SELES diatur taun 2017 suba.

    Iya mega andal program nya deka diatur ninting taun.

    Konference Kepala Pengajar Sarawak (Zon Tengah) 2018 tu diatur MESTR begulai enggau Opis Pelajar Nengeri Sarawak sereta digulu 470 iku bala Kepala Pengajar, 12 iku pemesai ari opis pelajar sereta bala bukai.

    Tuju program tu diatur iya nya deka nyungkaka tikas pemanah pengawa megai sekula ba Kepala Pengajar, nambahka kaul profesional antara Kepala Pengajar, bekunsika pemujur megai sekula sereta nyungkakka kaul antara sekula begulai enggau komuniti, ejensi sereta industri.

    Sama bisi datai iya nya Sekretari Mendam MESTR, Datu Sudarsono Osman enggau Kaban Kunsil Nengeri (Dudong) Datuk Tiong Thai King enggau pemangku Ketuai Opis Pelajar Sibu Salemah Chali. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: