Header Ads

  • Berita Tebaru

    MSPO deka dipejalaika kena bulan Disember 2019

    TERIMA KASIH: Sagah ti udah bejaku ba forum nya nerima tepa ari Nagarajan.
    Timpuh nya udah ditetap nya dikena meri peluang ngagai industri nyendiaka diri sereta ngulihka MSPO.

    KUCHING: Perintah udah setuju bejalaika skim ‘Pensijilan Minyak Sawit Mampan Malaysia (MSPO)’ berengkah bulan Disember 2019, senipak enggau peminta tinggi pemeli besai ba minyak sawit mampan.

    Menteri Muda Pemansang Tanah Adat, Datuk Roland Sagah madah, timpuh ke udah ditetap nya dikena meri peluang ngagai industri nyendiaka diri sereta ngulihka setipikit nya (MSPO).

    Nya mega dikena meri peluang ngagai pekebun mit dalam indusri nya ngulihka setipikit nya nengah chara nyendiaka insentif dikena nyaup ungkus ‘audit pensijilan MSPO’, ku iya.

    “Dikena ngenukuka agenda minyak sawit mujur ditan iya nya juluk 100 peratus bisi pensijilan MSPO, patut bisi penyereta ari semua dalam industri sawit.

    “Ba Sarawak naka ke diatu, urung 30 peratus ari pemesai 518,000 hektar di serata menua tu udah diaku MSPO. Lima belas ari 50 kilang sawit ti diaku MSPO asal ari Sarawak.

    “Enggau penyulut tu aku ngarapka Sarawak deka terus mansang ba taun 2018 nyengkaum dalam pensijilan MSPO.

    “Aku optimis dalam timpuh panjai Sarawak enda tau enda ulih tejapaika pensijilan MSPO dalam semua entiti lebuh manggai ba Disember 2019,” ku iya.

    Sagah mansutka pekara nya lebuh ke bejaku nyerumba ‘Certified Sustainable Palm Oil Forum: The Way Forward, Sarawak’ ti diatur Majlis Pensijilan Minyak Sawit Malaysia (MPOCC) ba sebuah hotel ditu, kemari.

    Nambahka nya iya madahka, Sarawak taun nyin kemari nyadi nengeri ke-2 pemadu besai nanam sawit ti bisi 1.56 juta hektar pemesai.

    Pemansang palan eksport pemadu besai udah meri empas ti manah ke lalu meransang industri minyak sawit sereta nyungkak penatai pemisi pekebun kitai, ku iya.

    “Taun 2017, Sarawak kedua pemadu besai nanam sawit iya nya ba kandang endur 1.56 juta hektar pemesai.

    “Sarawak ngasilka 4.1 juta tan minyak sawit mata (CPO), lalu industri tu dipasuk urung 34,590 pekebun mit di nengeri tu,” ku iya.

    Bejaku baru iya madahka ba abad ke-19 keterubah sawit ditanam nyadi utai ias, udah ngubah landskap betanam betupi di Malaysia.

    Sehari tu, urung 5.7 juta hektar kandang endur di serata menua ditanam sawit tauka urung 72 peratus tanah betanam betupi dikena ke tuju nya.

    Forum nya ti berandauka pasal ‘pensijilan mampan’, digulu lebih 300 iku pesereta ti nyengkaum pekebun mit enggau pekebun bedandang besai sawit.

    Bisi empat iku iya nya pengari ari MPOCC, Gerempung Pengempu Ladang Sawit (SOPPOA), SIRIM QAS International Sdn Bhd enggau WWF-Malaysia.

    Sama bisi datai ba forum nya kemari, Chairman MPOCC Datuk M.NagarajanOpis, Sekretari Mendam Betanam Betupi Moden, Tanah Adat enggau Pemansang Mengeri Datu Ik Pahon enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: