Header Ads

  • Berita Tebaru

    MSPO meri pemaik ngagai industri sawit

    Dr Sanath Kumaran
    KUCHING: Menijar Kanan Majlis Pensijilan Minyak Sawit Malaysia (MPOCC), Dr Sanath Kumaran madahka ‘Skim Pensijilan Minyak Sawit Mampan Malaysia (MSPO)’ bisi meri penguntung enggau rega ngagai industri sawit.

    Iya madahka skim nya ulih mantu nambahka produktiviti, meri empas ke positif sereta pengasi ngagai industri.

    “Penguntung ari pensijilan MSPO ari sukut nambahka produktiviti iya nya ulih mengoptimumkan asil enggau untung sereta ulih nyaga rampa menua, pengereja pengawa enggau raban bansa ti kena bungkur enggau ke bukai.

    “Pensijilan tu mega nambahka penyedar ngagai semua, ngurangka penusah bebadi, chara betanam ti manah sereta ke bukai, kelimpah ari nambahka semekih minyak sawit Malaysia enggau ulih diterima ba renggat dunya,” ku iya.

    Sanath mansutka pekara nya lebuh ke bejuraika keretas kereja MSPO Certification Scheme nyerumba Certified Sustainable Palm Oil Forum: The Way Forward, Sarawak ke diatur MPOCC ba sebuah hotel ditu, kemari.

    Nitih ku iya lebuh bejuraika pasal pensijilan MSPO di serata menua Malaysia bisi 518,793.96 hektar pemesai kandang endur kebun bedandang besai enggau kebun mit udah diaku MSPO, naka Disember 2017.

    Ari penyampau nya (518,793.96 hektar), kebun sawit di Sarawak ti pemadu mayuh udah bisi pensijilan MSPO iya nya 28.41 peratus lalu ditangkanka Sabah bisi 26.28 peratus.

    Lalu naka bulan Disember 2017, penyampau kandang endur besawit ke diempu pekebun mit ngatika diri (SPOC-Sustainable Palm Oil Clusters) ke udah bisi pensijilan MSPO di serata Malaysia bisi 4,804.93 hektar lalu 54.42 peratus ari pemesai nya di Sarawak.

    Dikena nyapai juluk 100 peratus bisi pensijilan MSPO, ke enda tau enda berengkah bulan Disember 2019, MPOCC chakah ngatur strategi.

    “Dikena nambahka pemayuh bisi pensijilan MSPO, kami chakah ngatur licha teknikal pasal MPSO ungkup kebun bedandang besai sawit,pemandang, latih tauka woksyop, ngatur program akreditasi, forum ninting taun CSPO, forum ninting taun NGO, Wang Turu Insentif MSPO enggau ke bukai,” ku iya. #UtusanBorneo

    No comments

    Post Top Ad