Header Ads

  • Berita Tebaru

    MYDIN Petra Jaya udah belabuh bejalaika operasyen kemari

    BARU DIBUKA: Abang Johari disempulang Ameer (kanan) bejalai ngemata barang ke dijual di MYDIN Petra Jaya.
    KUCHING: Palan bebeli barang MYDIN Petra Jaya dibuka kemari lalu pengawa dipenyadi Kepala Menteri Datuk Patinggi Abang Johari Tun Openg.

    Pampang ketiga MYDIN di Mengeri Kuching nya deka meri pengelantang ngagai peranak ke diau di kandang menua nya milih sereta meli barang ti dikedeka nengah rega ke patut.

    Bejaku rambau pengerami Abang Johari pechaya pasar MYDIN ulih mantu rayat ngintu belanja ninting hari enggau manah.

    “Ba MYDIN kitai ulih milih lalu meli barang nengah rega ke patut. Kedua kitai bulih stuk ke manah.

    “Ketiga, kitai ulih ngintu belanja nitihka bajet diri lalu ari nya kitai ulih ngintu pekara ruang bilik enggau manah,’ku iya.

    Abang Johari nambah pekara belanja chukup berat dalam ruang bilik.

    Ku iya, enti belanja ke dikena ngelui ari penatai pemisi, pekara nya tau mai penusah.

    Tang enti belanja diintu enggau manah ku iya, ruang bilik deka likun lalu MYDIN nyendia semua pengelantang ba sentang pengawa bebeli barang.

    Kelimpah ari nya, Abang Johari mega madah MYDIN nyendia awak dagang ngagai Orang Dagang Mit enggau Jelan Pemesai (SME).

    “MYDIN sedia ngadu kerejasama enggau SME di nengeri tu. Produk SME kitai ulih dijual di pasar MYDIN.

    “Ukai semina ditu aja tang di semua 26 pasar MYDIN di serata menua,’ku iya seraya ngelalau orang dagang SME ngerebut awak nya.

    Iya nambah, kerejasama nya deka nempa pemanah ngagai kededua piak entara orang dagang enggau MYDIN.

    “Enti kerejasama tu mujur, MYDIN ulih ngerembaika makit ngagai mengeri bukai di Sarawak baka ke di Miri, Bintulu sereta Limbang,”ku Abang Johari.

    Dulu agi ari tu MYDIN udah numbuhka pasar di CityOne enggau Samariang.

    Bela datai bini Abang Johari, Datin Patinggi Dato Juma’ani Tun Tuanku Bujang, Direktor MYDIN Mohamed Holding Berhad, Datuk Wira(Dr) Ameer Ali Mydin, Menteri Kereja Raya Dato Sri Fadillah Yusuf, Menteri Pengintu Pengelantang, Orang Indu, Komuniti, Ruang Bilik enggau Pemansang Nembiak Dato Sri Fatimah Yusuf enggau orang bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: