Nanta bedau putus runding, ngerebut SVP tauka enda -->
Cari Berita

Advertisement

Nanta bedau putus runding, ngerebut SVP tauka enda

Admin | beritaiban@gmail.com
January 24, 2018

Datuk Alexander Nanta Linggi
Nya berindik ari penyandang SVP Datuk Amar Douglas Uggah Ak Embas ditiki nyadi Sapit Presiden.

MIRI: Uchu presiden parti keterubah enggau penyandang Mandal Presiden PBB Datuk Alexander Nanta Linggi ngetanka pilih iya sekalika iya deka bediri minta pilih ba pangku pengawa mandal presiden kanan (SVP) dikena niki ba hiraki politik maya konferen raban tiga taun sekali kena 8 ngagai 11 Febuari taun tu.

Ditanya sekalika iya deka nerima enti dichalun ari pampang iya bediri minta pilih ungkup tiga pangku pengawa pemadu tinggi, ku iya nimbal, “Aku nerima aja sebarang pengawa dichalunka bediri tang aku deka mutus sekalika nerima tauka enda maya datai ba jam nya.”

Alexander, ke nyadi Sapit Menteri Pemansang Menua Pesisir enggau Kandang Menua sereta Kaban Parlimen (MP) Kapit, mansutka jaku tu lebuhka ditanya pasal berita ngerimbas pending iya engka deka berebutka pangku pengawa nya laban penyandang SVP Datuk Amar Douglas Uggah Ak Embas niki ngagai Sapit Presiden begulai enggau kaban parti ke sama enggau pangku pengawa, Sapit Kepala Menteri Datuk Amar Awang Tengah Ali Hasan.

Dulu agi ari nya, iya udah ngulu pengawa meri penerang di bilik konferen PWD Bagi Menua Miri pasal perambu ngangkatmanahka jalai kayu batang 199 km di Baram ari opis menteri iya.

Douglas enggau Awang Tengah bela nyadi pemangku sapit presiden parti pengudah penyandang Datuk Patinggi Alfred Jabu ak Numpang (PESAKA) ngemaduka diri, Datuk Patinggi  Abang Abdul Rahman Zohari Tun Openg (Abang Johari) terus diangkat nyadi presiden parti pengudah dipadu nyadi Kepala Menteri Ke-6 Sarawak.

Abang Johari mangku pangku pengawa tetinggi baka ti udah ditetapka konstitusyen parti dipadu nyadi Kepala Menteri Sarawak berindik ari pemidang Pehin Sri Adenan Satem dalam taun 2017.

Baka nya mega, orang ke dulu agi ari iya mangku pengawa presiden parti dalam taun 2015 lebuh iya nyilih Tun Pehin Sri Abdul Taib Mahmud ti ngemaduka diri nyadi Kepala Menteri Sarawak, udah nya dipadu nyadi Tuai Megai Menua (TYT) Sarawak.

Adenan midang ketegap bisi penanggul tungkul ati kena 11 Januari, beberapa bulan pengudah teulihka mandat besai dalam Pengawa Bepilih Nengeri (PRN) 2016, enggau TDC diperambu dalam taun 2015 dilanjar deka diatur pengudah bepilih.

Pengawa bepilih parti ti deka datai deka nentuka kuing parti laban ketuai serak kedua parti nyingkang ke dalam berindik ari ketuai serak keterubah kenyau ari PBB ditumbuh begulaika parti PESAKA enggau Bumiputera kena 30 April 1973, ngemaduka diri.

PESAKA iya nya parti ditumbuhka aki Alexander, niang Tun Jugah Barieng ti nguluka bala ketuai Iban dalam pengawa politik sida empu dalam taun 1962.

Bumiputera ditumbuh begulaika enggau PANAS sereta BARJASA, udah nya dipegulai lalu numbuhka Bumiputera dalam taun 1968.

Tun Jugah, ke nyadi Menteri Pekara Sarawak udah nya, presiden keterubah PBB dalam entiti begulai, lalu PBB kenyau ari nya ditusun baru nyadi parti politik ti ditempa ari pemereti ati enggau sempekat dipesetuju ti ngaku pangku pengawa komuniti bebida ti diari di Sarawak.

PBB nyadi parti politik lumur satu di Sarawak, nempa kuing pengerembai nengeri enggau nyadi sauh ngetanka penegap politik enggau pengelantang iya.

Alexander Nanta dipelaba deka nyadi menteri penuh pengudah pengawa bepilih besai, ke alai BN dipelaba deka menang baru lalu numbuhka perintah, ngisi penuduk ke puang ditinggalka Uggah, ti mulaika diri ke Sarawak, bediri dalam sitak kaunsil nengeri sereta dipadu nyadi Sapit Kepala Menteri.

Douglas suba nyadi Kebun Dandang Besai enggau Komoditi sereta penyandang MP Betong lalu baka ke enda bediri minta pilih maya pengawa bepilih besai, meri jalai ngagai Alexander mansangke mua. #UtusanBorneo