Header Ads

  • Berita Tebaru

    Nanta, raban ari KKLW ngatur program matau projek di Kapit enggau Song

    NERANG SILIK: Di Rumah Semut, Nanta nerang ngagai Borhan pasal pengawa beripai PPRT ngentak rumah panjai nya. KKLW ngagihka RM85,840 dikena bebelika ramu rumah dikena ngentak 15 pintu bilik ke baru nampung rumah panjai Rumah Semut. (Ari kiba) Nanta, Bohan enggau Elvis.
    KAPIT: Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi, ke lalu nyadi Kaban Parlimen (MP) Kapit, begulai enggau Sekretari Besai KKLW Datuk Borhan Bin Dolah, sereta 20 iku pemesai kanan ari opis menteri nya udah ngatur program dua hari berunggu ngagai Kapit enggau Pelilih Song, kena Hari Satu enggau Hari Dua tu tadi.

    Tuju pejalai sida iya nya ngulu pengawa meri penerang pasal pemansang enggau ngabas taba mayuh bengkah projek baka Program Perumahan Rakyat Termiskin (PPRT), Projek Mit Pemansang Menua Pesisir (MRP), Jalan Perhubungan Desa (JPD), Projek Mesra Rakyat (PMR) enggau Projek Bantuan Rakyat Khas (PBR Khas) ti dipelanja KKLW.

    Kena pagi Hari Satu, 29 Januari di Kapit, Borhan ngulu pengawa meri penerang bekaul pemansang enggau pejalai projek di Komplek Nengeri Bletih, lalu nangkan ke nya muakka ngalihari nyentuk lemai, sida ngabas taba projek ngagai tiga buah rumah panjai digaga di baruh PPRT iya nya Rumah Semut, Sungai Engkatit, Rumah Untang Jirau, Sungai Yong enggau Rumah William Unchat, Sungai Yong.

    Hari Dua, 30 Januari, pengawa matau di Pasar Kapit iya nya ngabas Jelatung Bot Panjai di Pasar Baru ti udah tembu tumu ari timpuh ke dilangkar, Balai Mayuh Guna Kampung China Bletih, Jematan Sungai Yong sereta pengawa nyambung Bekal Kuasa Karan Menua Pesisir (RES) enggau tali karan dalam ai meraka Batang Rajang, ngelawa ngagai rumah panjai di seberai sungai.

    Rambau aum pengarang berita begulai enggau Nanta kena 29 Januari, Nanta nerangka iya ngetuaika raban ari KKLW Putrajaya, Kuala Lumpur, deka meda empu atur pejalai mayuh bengkah projek dipelanja KKLW.

    Bala pemesai tu diuluka Sekretari Besai Datuk Bohan Bin Dolah enggau Sapit Sekretari Besai sereta 20 iku bala pemesai ke bukai ari opis menteri nya bejalai nemuai ke Kapit enggau Pelilih Song, kelebih agi ngagai sitak Parlimen P215 Kapit, ti mungkur sitak bepilih kunsil nengeri Katibas, Bukit Goram enggau Pelagus.

    Pengawa meri penerang keterubah diatur di Komplek Nengeri Bletih udah digulu iya empu, Kaban Kunsil Nengeri (ADUN) Pelagus Wilson Nyabong Ijang enggau ADUN Bukit Goram Jefferson Jamit sereta mega Pemesai Pelilih ari Kapit – Elvis Didit, Pemesai Pelilih Song Jackline August enggau Pemesai Pelilih Bukit Mabong Douglas Pungga, bala ketuai opis perintah begulai enggau tim ari KKLW.

    Penerang nya udah dikenataika Pemesai Pengatur Pengawa (Pemansang) Opis Residen Kapit, Wee Teck Min.

    Iya meri penerang silik pasal semua projek - PPRT, MRP, JPD, PMR, PBR Khas ti dipelanja KKLW. Pengudah nya, sida dibai ngabas projek ti dipejalai ba mayuh bengkah endur di Kapit kelebih agi di semanjai Sungai Engkatit enggau Sungai Ulu Yong. Projek tu iya nya PPRT di Rumah semut, Rumah Untang Jirau enggau Rumah William Unchat.

    “Rumah panjai ti udah disebut tadi nerima pemaik ari PPRT ti dipelanja KKLW. Kelimpah ari PPRT, kami mega beratika lampu jalai ti baru udah dilekat di Jalai Kampung di genturung pendiau nya.

    “Kami mega bisi meda kandang menua tu udah ngasaika bekal kuasa karan24 jam diatu nengah RES. Pia mega, kami deka beratika peminta rayat ba bekal ai beresi ti patut disambung ngagai genturung pendiau sida,” ku Nanta nerang.

    Ku iya, pagi Hari Dua, 30 Januari, sida deka bejalai ngelingi Kapit ngabas projek ti udah tembu digaga opis menteri (KKLW) nya, baka Jelatung Penyangkai Perau Panjai di Pasar Kapit sereta mega Balai Mayuh Guna Kampung Bletih China, dipelanja KKLW.

    Udah nya ditampung enggau pengawa ‘konvoi’ ngena entukar ari Kapit ngagai Song. Ku iya, di semanjai jalai nya sida mega deka ngabas mayuh bengkah projek di Kapit, Song enggau Kanowit sereta mega meresa Jalai Kapit-Song-Kanowit ke diatu agi digaga ba mayuh renggat.

    “Siti ari endur kami ngetu di Sungai Yong, jematan kedua deka digaga besepiak enggau jematan ke udah digaga diatu. Jematan beungkus RM20 juta deka digaga enda lama agi laban kunteriktor udah dikelala lalu dipadu gawa. Rambau pengawa meri penerang di Kapit, kami udah diterang taba projek deka disua ngagai kunteriktor ngambika ngaga jematan kedua meraka Sungai Yong dalam bulan Febuari tu,” ku iya nerang silik.

    Ku iya, sida mega deka ngabas pejalai RES di sepanjai jalai ngagai Song sereta projek nyambung tali karan dalam ai meraka Batang Rajang ngagai tanah seberai baka Rumah Penghulu Pasang Tuba, Nanga Ensilai, Nanga Belawai sereta sekeda endur ke bukai.

    Pia mega ku iya, sida deka meratika rumah panjai di semanjai jalai di Song sereta pengawa nirika lampu jalai di jalai genturung pendiau dia. Berebak enggau nya, bala pemesai sida empu beratika gaya jalai ti udah digaga ba mayuh renggat nyentuk sida ngenataika diri ba Song, ke alai sida mega deka ngabas jematan ti meraka Batang Katibas.

    Di Song, Pemesai Pelilih Jackline August deka meri penerang pasal pejalai mayuh bengkah projek KKLW di Pelilih Song ungkup taun 2017.

    “Kami deka meleka ari Song, nampung pejalai bebala mayuh nengah jalai darat ngagai Tamalat, napatka pengujung jalai ke udah tembu digaga. Udah nya, kami deka ngabas jalai alternatif ti ditengah peranak menua nya diatu seraya nganti jalai bukai tembu digaga. Jalai alternatif tu iya nya jalai ladang sawit enggau jalai batang ari Tamalat ngagai Ngungun, urung 21 km ditampung enggau sekeda jalai peribit,” ku Nanta nerang.

    “Berindik ari gaya jalai ba jalai alternatif – jalai ladang sawit enggau jalai batang, raban KKLW udah nemu baka ni gaya jalai nya. Kami beratika keretas kereja ari Opis Kereja Raya (JKR) Bagi Menua Tengah, berapa penyampau perambu belanja diguna dikena ngangkatmanahka jalai tu.

    “Nyema kitai ulih ngangkatmanah jalai tu, manah endar ungkup dua tauka tiga taun seraya nganti sambung jalai Seksyen B digaga,” ku Nanta.

    “Ngelansa pasal jalai ke deka digaga, bisi dua pakej. Siti iya nya 9.6 km ari Tamalat ngagai Ngungan. Iya ke udah dipadah aku kena 20 Januari tu tadi, taba endur ngaga jalai udah diserah ngagai kunteriktor ti udah dipadu gawa.

    “Siti agi pakej, urung 5.1 km ari Ngungun By pass, diatu ba renggat kepenudi randau begulai enggau raban kunteriktor. Dikearap kami deka beratika nya ba pengujung bulan Febuari tauka pun bulan March. Kitai deka bisi lis kepenudi diberi ngagai kunteriktor ti udah dipadu gawa.

    “Reti nya, kitai andal amat kereja tu ulih berengkah digaga dalam bulan March. Nya kebuah, projek sambung jalai tu deka tembu dalam timpuh dua taun setengah. Manah agi laban rayat udah teleba nengah jalai alternatif, nengah jalai ladang enggau jalai batang, kitai deka ngagihka sekeda belanja belalauka peminta digaga JKR Sarawak dikena ngangkatmanahka jalai nya. Nya alai, kami ngarapka diri ulih ngaga baka tu,” ku Nanta nerang.

    ADUN Bukit Goram Jefferson Jamit Unyat, ADUN Pelagus Wilson Nyabong Ijang, Pemesai Pelilih Kapit Elvis Didit, Pemesai Pelilih Song Jackline August, Pemesai Pelilih Bukit Mabong Douglas Pungga, Pemesai Pelilih Opis Pelilih enggau Opis Residen Kapit Wee Teck Min, Belayong Pok, Irene Merang, Robert Anyaw, Kelvin Ligong, Nuwin Lium, antara bala ke bisi mendingka jaku penerang ti dikenatai lebuhka ngabas taba projek. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: