Header Ads

  • Berita Tebaru

    Nengeri tu agi napi penanggul kurang nembiak ba pelajar STEM, ku Manyin

    Dato Sri Michael Manyin Jawong
    SIBU: Nengeri tu mengkang napi penanggul suntuk nembiak ke nyulut ba pelajar Sains, Teknologi, Injiniring enggau Matematik (STEM) nyentuk ke diatu.

    Menteri Pelajar, Sains enggau Pansik Teknologi (MESTR) Sarawak Dato Sri Michael Manyin Jawong madah, tikas penyampau nembiak ke nyulut ba STEM mengkang agi jauh ari juluk ati 60 peratus.

    “Naka ke diatu, semina 23 persin aja nembiak ke ngambi pelajar ba Sains.

    “Kelimpah ari nya, dalam kandang lima taun penyampau nembiak ngambi pelajar Sains ba Pom 4 mega balat amat kusut,” pia ku iya mantaika pekara nya maya ba Konference Kepala Pengajar Sarawak (Zon Tengah) 2018 ba sebengkah hotel ditu, kemari.

    Manyin madah, nyema pekara tu majak nyadi tu deka mai pangka ke enda manah ngagai nengeri tu ti deka nambaka pemayuh sida ke gawa nyadi injinia, lutur sereta sida ke landik ba Teknologi Pemadah (IT).

    Iya mega madah, gred peresa nembiak ba pelajar STEM balat enda ngemantupka ati ba bulih gred C ba pelajar Sains enggau Matematik ba pemutus peresa UPSR enggau SPM.

    Ketegal pekara nya, ku Manyin, eprogram bekaul enggau STEM beguna amat enti deka ngubah pekara tu, nyungkakka agi tikas penyulut nembiak.

    “Nya alai, ba piak MESTR, kitai deka ngaga program latih enggau pemansang ti bekaul ke diungkupka ngagai bala pengajar Sains enggau Matematik dikena nyaup nambahka penemu enggau pengelandik bala pengajar,” ku iya madah.

    Bekaul enggau Revolusi Perindustrian Keempat (Industri 4.0), Manyin madah, nengeri Sarawak ti ke diatu benung ba tikas Industri 2.0 enda ulih nyeliahka diri ari terus ‘engkechit’ ngagai Industri 4.0 enti enggai tinggal tauka nyadi enda relevan agi.

    Ku iya, nengeri tu meseti nyediaka diri ba ubah tu laban tu bekaul bendar enggau pengawa beranakka puku terus ari orang luar (FDI) ngagai nengeri tu.

    “Industri 4.0 tu deka ngubah pengawa ke digaga ti lebih agi bepelasarka ‘Internet of Things’ (IoT) ti ukai semina beguna ba dagang tang mega nyauka mungkur semua pengawa ke digaga kitai ninting hari.

    “Tu randaka menua kitai ngasilka modal mensia ti ulih napi teknologi baru tu ngambika pengawa beranakka puku ulih ditan sereta ditambahka agi,” pia ku iya nerang.

    Nya alai ku Manyin, pelajar enggau pengelandik ba teknologi ke baru, IoT, ‘cloud computing’ sereta penemu ke bukai beguna amat ba menua tu.

    “Ubah tu mega ngasuh kitai enda ulih ngelarika diri ari ngemeratka pelajar STEM iya ke ngembuan tuju mai pemansang ngagai menua enggau nengeri tu,” ku iya madah. #UtusanBorneo

    No comments

    Post Top Ad