Header Ads

  • Berita Tebaru

    Niang Tok Nan tetap dikenang belama

    RIP Tok Nan
    KUCHING: Pengudah berita ngenyit pemidang niang Pehin Sri Adenan Satem taun nyin kemari ti ngasuh serata nengeri begau, peranak Sarawak semua serak umur, bansa enggau jalai pengarap berasai sinu ngenang pemidang siku ketuai ti chukup pintar ba runding sereta berani.

    Niang Tok Nan, baka ke ditemu, siku ketuai ti nyelai ari orang bukai sereta nyadi peransang ti deka dikenang belama.

    Genap taun keterubah pemidang iya, peranak Sarawak nikal baru ngagai pemanah enggau kualiti iya nyadi ketuai.

    Ketuai Raban Bansa China, Temenggong Vincent Lau madahka Tok Nan nyadi siku ketuai chukup nyulut, ti ngembuan ulah manah patut ditunda sereta meri peransang ukai semina ngagai Sarawak aja tang mega menua tu.

    “Iya bisi kaul rat enggau rayat tang chukup jauh meri peransang ngagai sida. Iya siru sereta beratika hak enggau peminta ukai semina siti komuniti aja, tang semua komuniti, mit enggau besai, dalam pupu bansa enggau pupu menua di nengeri tu,” ku iya madah ngagai The Borneo Post lebuhka dikerandau kemari.

    Ngenang pasal pemanah pengawa iya ba pekara pelajar bansa China, ku Lau, niang Tok Nan nyata siku lelaki ti meda sereta nemu pemesai guna pelajar China dikena nerenakka penau ke besai agi ngagai Sarawak.

    “Pengirau iya ngayanka iya siku lelaki ti tau nempa, nyapai enggau gawaka pekara nyata. Nya alai, bisi agih belanja ungkup sekula China ti seruran nambah ninting taun,” ku iya.

    “Aku endang muji iya laban iya berani, pintar, manah ulah sereta gawaka rayat datai ari pupu bansa ti dipegai iya enggau penuh ati sereta pengeran. Iya nentuka kitai teulihka pemaik ari semua pengelebih ti patut diempu kitai,” ku iya nambah.

    Lau nyemetak madahka Sarawak begunaka mayuh agi ketuai baka Tok Nan, ti ulih ngempung rayat sereta meri peransang ngagai sida gawa begulai, bekunsika juluk ke sama, ungkup pengelantang dudi hari enggau Sarawak.

    “Semua kitai patut gawa nunda pemanah enggau ulah Tok Nan. Aku meri terima kasih sereta ngenang pemanah iya, nyadi ketuai sereta ngiring kitai taja enda lama, dua taun aja,” ku iya ngansak.

    “Iya udah muka jalai ngagai kitai lalu aku ngarapka kitai nampung pengawa iya mantu rayat enggau Sarawak mansang agi sereta nyapai pengidup dudi hari ti menyana. Tu ketuai kitai ti bepenau, deka mai pemansang ngagai nengeri enggau rayat,” ku iya.

    Lau mega madahka pemesai guna Sarawak begempung ke alai semua raban etnik bisi kaul rat laban tu deka mai penegap ti diguna dikena ngemansangka Sarawak.

    Presiden Serakup Gerempung China Kuching, Kota Samarahan enggau Bagi Menua Serian Dato Richard Wee, beratika peranak Sarawak agi berasai sinu sereta ngasaika pengelenyau siku ketuai ti besai ati.

    “Taja pia, pemanah pengawa nengah mayuh bengkah polisi ti dilanggur sereta dipejalai maya iya nyadi Kepala Menteri ngasuh kitai teulihka pemaik nyentuk ke sehari tu,” ku iya.

    “Iya udah ngengkahka batu besai ba polisi Sarawak, udah ditampung sereta dipejalai Kepala Menteri kitai ke diatu (Datuk Patinggi Abang Johari Tun Openg) enggau meruan” ku iya nambah.

    Antara polisi ti agi diasaika peranak Sarawak, ku iya, nyengkaum tol dikinsil, ngurang sereta ngelaungka bayar pupu, bantu sekula ngagai peribit China enggau sekula Misyen, meri pengawa enggau tanggungpengawa ngagai servis perintah, lantang ngerembaika main asal enggau jalai pengarap sereta mega nulak semua pekara ektremis jalai pengarap, bansa enggau chara pengidup ari raban politik Semenanjung Malaysia, ti diperatika nyau kelalu.

    “Tang pekara ti beguna endar, iya udah meri semua peranak Sarawak ngasaika diri ngempu sereta temegah ati nyadi peranak Sarawak enggau bansa, jalai pengarap sereta main asal diterima nyadi sebagi ari pesaka peranak Sarawak,” ku iya muji.

    “Kitai berasai gaga endar polisi ke ditetapka iya udah nyadika lalau kering ngagai kami ti dipegai Kepala Menteri Abang Johari, ngasuh kitai peranak Sarawak bebida ari semua sereta Sarawak diining peranak Malaysia ke bukai,” ku iya nambah.

    Nikalka pemanah kenang begulai enggau orang ti seruran dikenang laban kemerah sereta regas, Wee ke mega Chairman Kaunsil Pengatur Chung Hua Middle Schools (CHMS) No. 1, 3 enggau 4, ngenang lebuh Tok Nan betundi enggau ati lurus madahka Temenggong Lau enggau iya chukup amu, ngena jaku Melayu ‘diberi betis hendak paha’, ke mai reti, udah diberi betis, dekaka pah mega.

    “Jaku tu disebut Tok Nan lebuh iya setujuka peminta ari Temenggong Vincent Law enggau aku ba bantu belanja ungkup sekula peribit bansa China ba taun kedua, kami minta nikika penyampau, ke alai nya dikemendarka iya maya gempuru Taun Baru China ti diatur di MBKS. Taja pia iya terus ngemendarka peminta kami nya,” ku iya. #UtusanBorneo

    No comments

    Post Top Ad