Header Ads

  • Berita Tebaru

    Nyentuk ke seput padam lalu nadai tingki

    Chunto Tingki (MyKads)
    KUCHING: Pemidang Sulang anak Entra, 95, kena 14 Januari 2018 tu tadi ukai semina dikesinu sida sebilik tang mega ketegal sepemanjai pengidup, Sulang nadai ngembuan kad pengelala (Mykads).

    Diada lalu angkat besai semanjai 95 taun di Tanah Mawang Balai Ringin Serian, penusah ke ditapi Sulang nya bela malut bala anak, uchu enggau ichit iya.

    Sulang bisi 9 iku anak sereta 63 iku uchu sereta ichit ke alai tetiap iku sida ngembuan MyKads enggau chura ke bebida.

    Empat iku anak iya ngembuan MyKads chura mirah, siku chura gadung lalu dua iku chura biru (Mykads) tajapan asal ari ruang bilik ke sama.

    Pemar ke ditapi ruang bilik ditemu raban ari gerempung ke ukai dikuasa perintah baka ke Sarawak For Sarawakians (S4S), Saya Anak Sarawak (SAS), Sarawak Dayak Iban Association (SADIA) enggau Borneo Indigenius People Pact (BIPP).

    Semua NGO tu minta opis Pengerijista Bansa (JPN) nyaup mutarka pemar sida sebilik enggau lengkas nyemaka orang bukai ke bela nadai Mykads.

    Menantu Sulang, iya nya Micheal Luang madahka entua iya nadai MyKads nyentuk ke nadai tajapan ada di Sarawak ba taun 1920.

    “Iya entara sekeda orang ti dulu mungkal menua (Kpg Tanah Mawang).

    “Aku berasai sinu, enda lantang sereta ringat ketegal iya udah dichiping tajapan udah bebendar ngidupka ruang bilik diri,” ku Micheal.

    Micheal nambah, Sulang suah nguji ngulihka status peranak menua tu tauka MyKads.

    Ke penudi, iya ke beumur 93 taun nurun ke JPN ba bulan Julai 2016 ke alai maya nya Sulang disan siku anak iya ketegal ti enda dapat bejalai agi.

    Disempulang bini iya ke beumur 89 taun, seduai nempuh pejalai pengelama tiga jam ari Balai Ringin nuju JPN di Kuching.

    Enda nemu macha enggau nulis, genturung pendiau Sulang semina datai jalai (batang) ba taun 1980, entara kebuah iya nadai ngembuan sebarang penerang diri.

    Ketegal pinta MyKads Sulang suah ditangguh ungkup timpuh ke panjai, pinta iya ke penudi mengkang enda diputar nyentuk ke iya nadai.

    “Reti nya, semua bala anak bela napi pemar ngulihka penerang diri. Nama kebuah iya (Sulang) pedis ngulihka hak nyadi peranak menua tu,” Ku Micheal nambah.

    Aktivis Hak Mensia Mayuh ari SADIA, Bill Jugah ke bela ngulu pengawa ngubur Sulang madah kes sida sebilik patut enda dilak kelalu lama.

    Ku Bill, mayuh orang ke bela datai ari genturung pendiau ke sama enggau Sulang udah bisi MyKads.

    “Sulang nyentuk ke nadai lalu enda diberi Mykads tajapan udah suah ngenataika pinta,” ku Bill.

    Nitihka penerang Bill mayuh orang ari kandang endur Tubau, Bintulu, Mukah, Sibu enggau Miri minta bantu raban NGO mutarka isu enda diberi MyKad.

    “Pinta tu datai pengudah kitai mujur mantu sekeda pinta MyKad ungkup orang ke diau di Kuching, Tebakang, Serian enggau Balai Ringin,” ku Bill ke disempulang siku agi Aktivis Hak Mensia Mayuh ari SADIA, Peter John. #UtusanBorneo

    No comments

    Post Top Ad