Header Ads

  • Berita Tebaru

    Panel komiti renggat bagi menua mutarka pekara bekaul servis ketuai komuniti ditumbuh

    Sherrina Hussaini
    MIRI: Panel komiti ba renggat bagi menua udah ditumbuh ngambika ulih ngemata pekara bekaul enggau servis ketuai komuniti.

    Residen Miri, Sherrina Hussaini madah pengawa numbuhka panel komiti nya berindik ari pemutus ke digaga perintah dikena meri kuasa nyiri,nyambung enggau ngetuka servis ketuai komuniti ngagai opis residen ba renggat residen bagi  menua.

    “Sebedau tu, semua pekara bekaul enggau pengawa nyiri,nyambung  enggau ngetuka servis ketuai komuniti digaga indu opis ke mega opis Kepala Menteri.

    “Tang  diatu nengah panel komiti, nya amat ulih mantu ngenyampatka proses mutarka isu bekaul ketuai komuniti kelebih agi ba pengawa lubah nyiri enggau nyambung servis sida. Taja pia, pemutus bekaul enggau ketuai komuniti deka  digaga nengah siti penemu ari panel komiti nya,” ku iya madah ngagai media pengudah nyuaka setipikit nampung servis Temenggong ngagai empat iku ketuai komuniti ba Opis Residen Miri ensanus.

    Ba sentang kaban panel komiti ungkup bagi  menua Miri, Sherrina deka mangku pengawa nyadi chairman lalu sapit iya, iya nya sekretari panel komiti nya.

    Ku iya baru, bala YB ba sitak di menua nya enggau Opis  pelilih menua deka nyadi  kaban panel komiti.

    Panel komiti ku iya, patut dikearap ngelala sereta ngaga pemutus sapa bagi chalun baru ungkup pangku pengawa Temenggong tauka Ketuai Bansa, nampung tauka ngetuka servisi ketuai komuniti sereta mutarka isu  bekaul nyiri ketuai komuniti.

    Nya laban iya dekaka ketuai komuniti majak komited sereta bejalaika tanggungpengawa sida ke nyadi penyambung entara perintah enggau rayat ba renggat nembiak redak.

    KETUAI KOMUNITI: Sherrina (lima kiba), Aziz (dua kiba) sereta ke bukai begambar enggau Temenggong Abdul Rahman (empat kanan), Temenggong Wilson (tiga kiba) enggau Temenggong Joseph (empat kiba).

    Dulu ari nya, iya udah nyuaka setipikit nampung servis bejalaika pengawa ngagai Temenggong Joseph Ngau Lian (Kenyah), Temenggong Wilson anak Limping (Iban) enggau Temenggong Abdul Rahman Fadzailungkup komuniti bansa Melayu.

    Siku agi penerima, Temenggong Datuk Hasan Sui enda ulih datai nerima setipikit nampung servis iya ngarika komuniti Penan. #UtusanBorneo

    No comments

    Post Top Ad