PBB di Parlimen Lanang, Sibu sedia nyukung chalun BN di sitak nya -->
Cari Berita

Advertisement

PBB di Parlimen Lanang, Sibu sedia nyukung chalun BN di sitak nya

Admin | beritaiban@gmail.com
January 24, 2018

Dr Annuar Rapa’ee
SIBU: Lima pati Parti Pesaka Bumiputera Bersatu (PBB) iya nya Nangka, Bawang Assan, Pelawan, Dudong enggau Bukit Assek semampai nyikap diri nyaup sapa-sapa chalun Barisan Nasional (BN) bediri ba Parlimen Lanang enggau Sibu.

Chairman PBB Pati Nangka Dr Annuar Rapa’ee madah, semua raban ari lima bengkah pati nya deka nyaup chalun BN ba dua bengkah penuduk parlimen nya.

“Diatu kitai agi nganti sapa bagi chalun BN ba penuduk Lanang enggau Sibu.

“Kitai udah besedia nyukung enda ngira sapa chalun BN tu,” pia ku iya madah.

Dulu agi ari tu iya ditanya sentang lima bengkah pati PBB nyediaka diri napi Pengawa Bepilih Besai Ke-14 (PRU14), empai lama tu tadi.

Iya ti mega Menteri Muda Pelajar enggau Pemansik Teknologi madah, penyampau orang ke nurun ngundi beguna bendar nentuka pemujur BN ba Parlimen Lanang enggau Sibu.

“Kitai begunaka peratus ke mayuh rayat datai ngundi ari pati PBB ditu ngambika awak menang ba dua penuduk tu tampak agi,” ku iya madah baru.

Taja pan baka nya ku iya, ejen BN beserimbai enggau PRU14 tu naka ke diatu empai ditumbuhka ba dua iti parlimen nya.

Maya bejaku ba pengawa bejadi Aum Deligit Pati PBB Nangka, Pelawan, Dudong, Bawang Assan enggau Bukit Assek bulan November taun dulu suba, Annuar madahka semua lima bengkah pati nya deka bediri tegut nyukung chalun ke dipilih ketuai BN bediri ba Parlimen Lanang enggau Sibu.

Iya madah, taja dua iku chalun nya ukai ari PBB tang dua iku chalun nya meseti bekerejasama enggau PBB ukai semina maya PRU tang mega udah menang ila. #UtusanBorneo