PBB dikeandalka rayat terus ngiring Sarawak - Berita Iban Online

Header Ads

  • Baru Nyadi

    PBB dikeandalka rayat terus ngiring Sarawak

    Datuk Patinggi Abang Johari Tun Openg
    KOTA SAMARAHAN: Rayat nengeri Sarawak arapka Parti Pesaka Bumiputera Bersatu (PBB) terus nyadi tulang belakang ngiring nengeri tu.

    Kepala Menteri Datuk Patinggi Abang Johari Tun Openg madah enti orang enda rindu ke PBB, dikangau bai baum pan tetap enda datai, tang laban rayat pechaya enggau (bala ketuai) PBB, rayat sanggup ngambi jam nya datai ngagai atur pengawa PBB.

    “Parti kitai parti ke nyelai, parti ke bisi adat pesaka, ke ditusun enggau silik ari kelia datai ke diatu, ari jeman Tun Abdul Rahman Yaakub enggau Apai Jugah (Tun Jugah) datai ngagai Pehin Sri Tun Taib Mahmud, Datuk Patinggi Alfred Jabu,niang Pehin Sri Adenan Satem enggau aku empu, datai ke sehari tu, tusun nya ditusun enggau silik sereta manah.

    “Apai Jugah enggau Tun Rahman ulih ngaduka politik kitai. Ari 1963-1970, kitai napi penanggul politik, bisi sekeda nya masuk kort, merejuk parti…Semua bisi.

    “Dalam taun 1970an, niang Tun Abdul Rahman Yaakub enggau Apai Jugah ngempung Pesaka Bumiputra kitai begulai enggau Parti Sa’ati Rayat Sarawak (SUPP), alai berindik ari nya, kitai mungkal perintah kitai, iya nya perintah begempung alai udah nya, iya nyadi Barisan Nasional (BN),” ku iya.

    Abang Johari madah munyi nya lebuh bejaku mungkal Aum Pemesai Tiga Taun Sekali pampang Parti PBB Zon 2 (N9.Padungan, N10. Pending, N.11 Batu Lintang, N.12 Kota Sentosa, N.12 Batu Kitang, N.14 Batu Kawa, N.15 Asajaya, N.16 Muara Tuang enggau N.17 Stakan) di Dewan Suarah Kota Samarahan ditu, kemari.

    Taja pia, Abang Johari ti mega nyadi Presiden PBB sereta Chairman BN Nengeri madahka politik Sarawak diatu entap.

    Iya nmadahka, datai ngagai taun 1981, Pehin Sri Tun Taib Mahmud mangku pengawa nyadi kepala menteri, enggau siti pengawa mindahka kuasa ke manah, lalu nangkan nya Tun Taib mungkal menua tu bepelasarka politik pemansang.

    “Sitak Samarahan nyadi sitak keterubah dipungkal, enti kelia, Samarahan tu kampung aja, tang diatu Samarahan udah berubah nyadi mengeri ke tebilang, kelebih agi iya mega dikelala enggau nama Mengeri Penemu (Bandar Ilmu) laban pemayuh universiti ke bisi ba sitak tu.

    “Lalu baka nya mega enggau pelilih menua bukai, Betong, Sarikei, Kapit, Mukah, tau dipeda (iring) parti PBB enggau rayat ke nyukung, mungkal serata menua Sarawak ke di kemansangka kitai,” ku iya.

    Abang Johari ti mega nyadi Menteri Wang enggau Perambu Ekonomi nandu baru tu jeman Tun Taib, niang Pehin Sri Adenan lebuh sida iya mangku pengawa nyadi Kepala Menteri.

    “Niang Adenan nemu penanggul ke ditapi rayat di menua pesiisr laban iya empu kala nyadi wakil rayat di Muara Tuang, lalu iya sigi betatika pemansang di menua pesisir.

    “Ketegal kami tu sebagi ari tim Adenan, nya kebuah PBB ngatur konvensyen majakka (iring) pun menua. Chara kitai ngemansangka menua tu ngena chara era baru, Tun Taib, Adenan enggau aku empu. Aku majakka pengawa (ngiring) ke udah enggau jeman ke penuh enggau empas digital,” ku iya.

    Bechuntoka siku orang dagang ke tebilang sereta bepengeraja, Jack Ma ari China ke tebilang enggau pengawa dagang ‘online’, iya nyadi orang ke pemadu kaya ketegal dagang ‘online’, ke ngena nama ‘Ali Baba’.

    “Menua kitai bepengeraja, bisi ai, tanah, baja, nama penyalah kitai nyadi ‘Jack Ma’? Kitai pan tau ngeluar sereta eksport pemakai, durian, kraf jari kitai.

    “Nya kebuah aku chukup ngemeratka ekonomi digital, tang peneras internet kitai enda tau enda laju, ke patut diangkatka,” ku iya ke udah meri ungkup RM1 billion kena ngemanahka agi peneras internet nyengkaum mungkur sitak Samarahan.

    Naka diatu, iya madahka opis MCMC (Multimedia and Communications) semina ulih ngaga peneras internet ke Sarawak dalam 5mbps tang penyampau nya sigi enda chukup laju.

    “Pengabis kurang pan, di menua pesisir, enda tau enda pengabis besai dalam 50 Mbps. Baka di Bandaraya Kuching, laban pemayuh mensia, peneras internet dalam 100-150 megabit se siken.

    “Ekonomi kitai begunaka digital, semua pekara bekait enggau digital nyengkaum hal tanah kita. Nya alai, Opis Tanah & Survei pan enda tau enda ngena digital, semua dalam data. Perintah pan ngena data enggau digital,” ku iya ke ngarapka Sarawak ulih nyadi sebuah menua ke maju manggai 2030.

    Abang Johari ti mega nyadi Menteri Pemansang Mengeri enggau Rampa Menua nandu baru, madahka PBB sesebengkah parti ke ngembuan mayuh pengari rayat orang indu.

    “Kitai ba PBB, meri peluang ngagai orang indu nyadi pengari rayat, lalu baka nya mega enggau nembiak, laban kitai gawa ukai ketegal siku-siku aja tang ke bansa sereta Bumiputera.

    “Kitai mega meri peluang ngagai orang ke biak-biak, tang semina siti aja pesan aku, anang kelalu berumban, ambi timpuh nyadi nembiak, belajar dulu sereta ngiga penemu,” ku iya.

    Sama bisi enggau ngulu atur pengawa nya kemari, Ketuai Nembiak PBB ti mega nyadi Menteri Kereja, Dato Sri Fadillah Yusuf, Sapit Menteri Ketuai Orang Indu PBB, ti mega nyadi Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah, Kaban Majlis Tertinggi PBB ti mega nyadi Menteri Pengawa Dagang Temuai, Seni, Adat Pesaka, Nembiak, Lumba enggau Main, ti mega nyadi chairman pengatur aum tu, Datuk Abdul Karim Rahman Hamzah sereta sekeda pemesai bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads