Header Ads

  • Berita Tebaru

    PDP sitak tengah enda lantang ati enggau jaku Karim bekaul chalun BN di Saratok

    Teo Boon Siew
    SIBU: Parti Progresif Demokratik (PDP) sitak tengah bela enda lantang ati enggau ulah Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah ti bejakuka pekara bekaul enggau chalun di parlimen Saratok ba Pengawa Bepilih Besai Ke-14 (PRU14) ke deka datai.

    Sapit Chairman PDP sitak tengah Teo Boon Siew madah, enti nunda, Karim siku orang lama dalam parti Barisan Nasional (BN) nemu bagi lebas lalu nadai kebuah nyukung orang bukai ti ukai dalam BN.

    “Kitai enggai meda diri sebilik dalam BN charut lalu betalat enggau pangan diri.

    “Tu deka ngenyaika nama manah BN ngelama tu,” pia ku iya maya aum media ditu, lemai kemari.

    Iya mantaika jaku tu dikena ngayanka piak sida ngenggaika Karim ti madahka diri nyukung ex-Presiden Parti Progresif Demokratik Sarawak (SPDP) ke diatu udah ditukar enggau nama PDP, Tan Sri William Mawan Ikom ba surat berita empai lama.

    Nambahka jaku iya baru ku Teo, Parlimen Saratok endang ungkup PDP ari suba lalu sida nemu nama bagi pekara ke nyadi enti dibida enggau orang luar.

    “PDP ukai parti ke baru tang parti ke lama megai Parlimen Saratok.

    “Nya alai, parti tu bisi kuasa milih sapa bagi chalun ke deka bediri ngetanka penuduk tu,” ku iya sambil madah parti sida enda ngibuhka orang bukai ke deka bediri dia baikka bisi kuasa tauka nadai kuasa dikena ngachau penegap PDP ba parlimen nya.

    Teo madah, ngelama tu PDP naka alah megai rayat dia lalu nama pemansang ba parlimen nya ukai diberi Mawan tang datai ari parti PDP.

    “Maya iya nyadi pengari rayat dia suba iya endang ari PDP.

    “Tang pemansang ke ditumbuhka ba parlimen nya ukai ari iya tang datai ari parti kitai,” pia ku iya madah.

    Berindik ari pekara nya, iya madahka piak sida bepelasarka ‘Semangat’ BN ransing bejalaika pengawa sereta beserakup ngambika PDP mengkang megai Parlimen Saratok sepengudah PRU14 tu.

    “Kitai mega ngarapka kaul sereta kerejasama komponen parti BN ke bukai besaup ngambika ulih megai Parlimen Saratok maya PRU14 ti endang penuduk enggai PDP sebedau tu.

    “Anang ngachau pangan diri ke sama dalam BN laban belaya diri sebilik enda manah ke parti,” ku iya madah baru.

    Sama bela datai maya aum media tu iya nya Mandal Chairman enggau Sekretari PDP sitak tengah Datuk Lau Kueng Chai enggau Ting Hua Sing. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: