Header Ads

  • Berita Tebaru

    Pejalai raban Gerempung Peranak Pang Junan (PJPA) ke menua asal mulaika pengingat lama

    Entili Garaji
    KANOWIT: Mulaika pengingat lebuh urung 50 iku kaban ari Gerempung Peranak Pang Junan (PJPA) ngaga pejalai nengah Sungai Ngemah ngagai Nanga Pang ngagai alai sida diau kelia.

    Ba pejalai ke pemadu baru ti betuaika chairman PJPA, Entili Garaji lebuh bejadika gerempung nya ke disempulang enggau bejadi sistem Tagang.   

    Pejalai  ngena  perau panjai nya berengkah pukul 9 pagi  ari  Nanga Ngungun nuju pelan pengentap sida ke 40 taun ti udah.

    Pejalai nya begunaka timpuh enam jam ngenataika diri ngagai Nanga Pang enti maya ai manah  lalu lama agi ari nya enti maya ai mabu. 

    Semanjai jalai nya, sida bisi mansa sekeda endur ke  jelai rita. Siti ari  palan nya dikelala enggau nama ‘Batu Barung’ ke alai peranak menua pechaya kelia rumah panjai nya bebali nyadi batu pengudah bisi siku indu ngereja pengawa ke mali.

    Nitihka jerita, indu nya rerakah ketawa lebuh siku engkatak engkechit lalu tama ngagai kain iya. Ulah nya udah ngujungka hari kudi lalu rumah panjai sida bebali nyadi batu.

    Sida mega bisi mansa Pendam Bungkang alai 12 iku penyaga  garis entara menua diserang kominis ngenyit kena 27 Ogos, 1970 lebuh ti benung matau ba ulu Sungai Ngemah.

    Ba sebengkah endur jauh di ulu Nanga Jagau, Nasat Sauh nusui jerita madahka dua iku soldadu ari Semenanjung Malaysia udah lebah pengudah perau panjai sida karam di Ulu Sungai Ngemah.

    Ku iya, iya  siku ari sida ke enggau ngiga seduai ke lemas nya  maya jeman siga ketegal kominis kelia.

    BEBATAK: Penepan perau nurun ari perau sida lebuh datai ba Wong Silau.
    Nanga Jagau nya siti  ari skim pengentap ti ditumbuhka Printah Pengelikun Kandang Menua Rajang (RASCOM) dalam taun 1973 di Kanowit nyengkaum Nanga Ngungun enggau Nanga Tada.   

    Entara Nanga Jagau enggau Rantau Lugai, peranak  rumah panjai nya bisi mansa sekeda wong, baka Wong Entekai, Wong Memaloh, Wong Silau, Wong Tarik Ili, Wong Aris, Wong Tibang enggau Wong Empeliau.

    Wong Silau tebilang ketegal mabu sereta ngembuan mayuh batu.

    Peranak rumah panjai ti nepan perau mansa Wong Silau, enggai enda pan angkat ari perau ketegal irauka pengelikun diri.

    Ku Entili, sida ninggalka rumah panjai, umai enggau kebun buah di Nanga Pang maya kominis benung siga ba taun 1970an.

    Ku iya, sida ninggalka rumah panjai nya ketegal pekara pengelikun lalu ngambika perintah munaska kominis dia.

    Entili mega madah, seberai Sungai Pang patut bisi sebuah sekula endur bala nembiak ari sekeda rumah panjai di Ulu Ngemah belajar.

    Iya siku ari nembiak ke besekula dia maya sekula nya ditutup ke alai maya nya sida dipindahka ngagai palan pengentap baru di  Nanga Ngungun. #UtusanBorneo

    No comments

    Post Top Ad