Peminta ngundi nengah pos maya PRU14 udah dibuka -->
Cari Berita

Advertisement

Peminta ngundi nengah pos maya PRU14 udah dibuka

Admin | beritaiban@gmail.com
January 24, 2018

Tan Sri Mohd Hashim Abdullah
Peranak Malaysia ti diau di menua luar ulih berengkah ngaga peminta, nitihka beberapa atur ti ditetap.

KUCHING: Peranak Malaysia ti udah rejista nyadi pengundi tang diau di menua luar, diatu tau minta ngundi nengah pos maya Pengawa Bepilih Besai Ke-14 (PRU14) ti deka datai.

Nitih ku Chairman  Komiti Pengawa Bepilih Besai (SPR) Tan Sri Mohd Hashim Abdullah, dikena minta perengka guna ngundi nengah pos berengkah dibuka kemari, sida patut ni  tihka beberapa atur ti ditetap.

Atur tu iya nya sida meseti siku pengundi rejista (kategori: Pengundi Bukai tauka ukai Pengundi Enda Datai (PTH) Menua Luar), kala diau di Malaysia tauka mulaika diri ke Malaysia enda kurang ari 30 hari dalam timpuh lima taun sebedau Parlimen dipadam tauka Aum Kunsil Nengeri (DUN) ti benung bejalaika kuasa, sereta diau mendam di menua luar.

Taja pia, ku iya, sida ke diau di selatan Thailand (wilayah Narathiwat, Pattani, Yala, Songkhla enggau Satun), Singapura, Brunei sereta wilayah Kalimantan Indonesia enda ulih diberi peluang ngundi nengah pos lalu sida patut pulai ngundi maya hari muai undi dipejalai.

“Peranak Malaysia ti rejista nyadi pengundi lalu ulih ngundi maya hari muai undi tau minta awak ngundi nengah pos ngena Pom 1B,” ku iya nengah sebengkah penerang berita, kemari.

Ku Hashim, SPR mega udah ngemasukka Pom 1B – Pom Peminta Keretas Undi Pos (Pengundi Pos Menua Luar) – tau dilawa ba www.spr.gov.my enggau atur chara ngisi pom nya mega tau dibatak ari ‘website nya.

Peminta nengah Pom 1B ti udah tembu diisi ku iya, tau dianjung ngagai Indu Opis SPR di Putrajaya nengah beberapa chara.

Iya sekalika nengah e-mel, upup@spr.gov.my; tauka faks ke 03-8881 0424/0399/0394/0386/0369; tauka pos ngagai Suruhanjaya Pilihan Raya Malaysia Menara SPR, No.2 Jalan P2T, Presint 2, Pusat Pentadbiran Kerajaan Persekutuan 62100 Putrajaya (u.p. Unit Pengurusan Undi Pos Luar Negara).

“Peminta ngundi nengah pos ari menua luar deka ditutup maya hari parlimen dipadam,” ku iya seraya nambah, peminta diterima pengudah pukul 12 malam sehari nya enda deka diatur.

Tetiap peminta deka dipadahka status peminta sekalika pas tauka enda pengudah tetiap peminta diterima sereta diatur SPR, ku iya seraya nampung, peranak Malaysia ti rejista nyadi PTH di menua luar iya nya pengundi pos, lalu nya kebuah, enda ibuh minta.

Taja pia, iya ngelalau semua peranak Malaysia ti rejista nyadi PTH Menua Luar ngemaruka penerang bekaul address pemadu baru di menua luar nengah Sistem Aduan dan Pertanyaan SPR di portal rasmi SPR.

Ku iya, peminta ngemaru address pemadu baru di menua luar patut disempulang (dimuat naik) salin passport dikena ngenukuka pengelala diri ari peminta.

“Tuju pengawa ngemaru address pemadu baru di menua luar dikena nganjung keretas undi pos ungkup PRU Ke-14 ti deka datai,” ku iya.

Reti iya maya PRU14 ti deka datai, ku iya, pengawa nganjung keretas undi pos deka diatur Pos Malaysia Bhd lalu badu agi nengeri Opis Menteri Luar (Wisma Putra).

Sebarang tanya bekaul enggau pekara nya, mensia mayuh tau betelefon nuju lumur 03-88810081 tauka emel ke upup@spr.gov.my. #UtusanBorneo