Pemisi jalai ngubah pengidup peranak semanjai Jalai Sungai Ulu Yong -->
Cari Berita

Advertisement

Pemisi jalai ngubah pengidup peranak semanjai Jalai Sungai Ulu Yong

Admin | beritaiban@gmail.com
January 24, 2018

Jefferson Jamit Unyat
KAPIT: Kaban Kunsil Nengeri (ADUN) Bukit Goram Jefferson Jamit Unyat madahka pengidup peranak rumah panjai di semanjai Jalai Sungai Ulu Yong sereta kandang menua bukai udah mayuh berubah pengudah jalai digaga.

“Berasai lantang meda sereta ninga rayat madahka pengidup sida manah agi pengudah rumah panjai sida bisi disambung jalai. Pengempu tanah teulihka penguntung berimbaka tanah sida dikena ngulihka penatai pemisi sereta meri nilai tambah ngagai tanah.

“Sida teulihka mayuh penguntung ari pemisi sambung jalai. Diatu, pemayuh bansa aktiviti betanam benung ngerembai ditu,” ku Jamit pengudah ngabas jalai batu baru, 1.3 km pemanjai ba ujung Jalai Ulu Yong ngagai taba baru Rumah Jandok, pagi kemari.

Jalai batu baru 1.3 km pemanjai beungkus RM300,000 berengkah digaga dalam bulan Disember 2016 lalu ditimpuh tembu dalam tiga bulan. Jalai tu digaga di baruh Program Transformasyen Menua Pesisir (RTP).

Taja pia, nitih ku kunteriktor Yong Hua Seng, atur pejalai kereja ngelui ari timpuh alu dipelaba tembu tengan bulan March 2018.

Iya beambika chunto Tuai Rumah Untang Jirau diatu nanam sayur ba tanah iya lalu bulih penatai pemisi RM1,500 sebulan. Sayur tu dijual di Pasar Kapit.

“Suba ni bisi? Di makit maya pagi hari, kitai meda orang bukai ari jauh enggau semak bejualka asil kampung enggau kebun sida, ngulihka belanja dikena beridup. Tu ulih dikereja enggau pemisi sambung jalai baka Jalai Melekun, Jalai Mujong, Jalai Bukit Goram, Jalai Antaroh, Jalai Ulu Yong enggau Jalai Kapit-Sungai Yong.

Ku iya nerang, endang baka mimpi ngemai asil kampung dijual di Pasar Kapit enti sema nadai jalai. Suba, sida mindah ngena perau mit ngili Sungai Yong, nyauka sehari pejalai ari rumah panjai ngelawa pasar. Diatu, deriba semina 45 minit aja.

“Tikas pemanah pengidup di Jalai Sungai Ulu Yong ditu udah mayuh berubah. Bala anak besekula di Sekula Primari (SK) Sungai Ulu Yong, tiang pemanchar arus penyambung didiri, chapel digaga ungkup raban orang Kristian, bekal kuasa karan 24 jam nengah Bekal Kuasa Karan Menua Pesisir, bekal ai beresi nengah Sistem  Graviti enggau ke bukai.

“Mayuh pekereja kelebih agi orang gawa perintah diau di rumah, gawa pulai hari nengah jalai dibelakin ngagai pasar,” ku Jamit.

Ku iya nerang, idup muntang agi laban bisi semua penyikap perengka guna pemun. Iya ngingatka semua rayat kesemua tu bisi laban ari pengibuh perintah ngintu rayat.

NGABAS PROJEK JALAI: Jamit ngabas pemansang kereja ba jalai batu baru 1.3 kilometer ari ujung Jalai Sungai Ulu Yong ngagai taba baru Rumah Jandok. (Ari kiba) Cochan Awie, Jason Jarraw, Yong Hua Seng, Jamit sereta Ambrose Abong.

Ngenang pasal politik, Jamit nangkan rayat anang ngaul diri sereta kiruhka isu ti nadai pulaika penguntung ngagai sida.

“Menua ulu baka Kapit, kitai enda ibuh ngaul diri enggau isu ti nadai kaul enggau pekara ti nyadi di menua tu (baka kes makai suap Menteri Besai) laban bisi isu bukai menua tu ti patut diperatika begulai kelebih agi ngaul pengawa pemansang menua enggau program pemansang ti nguntungka kitai,” ku Jamit.

Iya nyemetak madah, pegai ketuai ke diatu, Menteri Besai Datuk Seri Mohd Najib Tun Razak, kelebih agi Kapit udah mayuh berubah.

“Diatu kitai bisi sambung jalai ti nyambung Kapit ngagai serata nengeri. Seraya program bukai dipejalaika Najib ngemai pemaik ngagai rayat baka BR1M, e-kasih, bantu rumah (Projek Bantuan Rumah) enggau mayuh ke bukai.

“Nama kebuah di baruh pegai ex-Menteri Besai, Tun Mahathir enggau ex-Sapit Menteri Besai Datuk Seri Annuar Ibrahim, sida enda meri bantu ke baka nya ngagai rayat,” ku iya nanya.

“Nyadi pengari rayat, aku ngasaika ketuai kitai ke diatu, menteri besai enggau Kepala Menteri Abang Zohari endang ngemeratka rayat, kelebih agi di menua pesisir. Ba politik, kitai nyukung ketuai ti endang siru sereta nyukung rayat,” ku Jamit nandu.

Iya minta rayat seruran meri sukung bala ketuai di baruh BN kelebih agi maya Pengawa Bepilih Besai Ke-14 (PRU14) tu ila.

“Kaban Parlimen (MP) kitai ke diatu, Datuk Alexander udah nyulut ba pengawa iya ngelama tu lalu iya dipilih kitai nyadi chalun maya pengawa bepilih tu ila. Kitai agi begunaka mayuh pemansang, nya kebuah kitai patut terus nyukung ketuai kitai. Sukung tegap ari rayat deka mantu nentuka iya terus megai rayat lalu tu pengarap kitai, iya deka teulihka mangku pengawa meruan agi (menteri penuh) dalam kabinet perintah besai,” ku Jamit.

Pemesai Pekara Khas Sapit Menteri Pemansang Menua Pesisir enggau Kandang Menua Datuk Alexander Nanta Linggi Ambrose Abong Bugek, Kunteriktor Jalai Yong Hua Seng, Palan Servis PBB Bukit Goram Jason Jarraw enggau Cochan Awie. #UtusanBorneo