Header Ads

  • Berita Tebaru

    Penanggul ai kurang deras ke ditapi peranak Rumah Grace Jalai Salim-Stabau nyau majak raya

    LOGO: Opis Menteri Pemansang Menua Pesisir enggau Kandang Menua (KKLW)
    SIBU: Penanggul ai kurang deras ke suah diasaika peranak Rumah Grace Itun, Jalai Salim-Stabau diatu nyau majak raya berindik ari peminta sida ngulihka paip besai diatu lalu bedau dikeamat.

    Peminta nya kala dikenatai maya taun 2014 lalu nerima timbal ari Kaunsil Ai Sibu (LAS) ti madah projek paip besai nya deka digaga nengah Opis Menteri Pemansang Menua Pesisir enggau Kandang Menua (KKLW).

    “Penanggul ai kurang deras tu suah nyadi ari pagi nyentuk ke lemai maya mayuh orang nguna ai dikena mandi, berapi enggau ke bukai.

    “Pekara nya manah baru maya tengah hari enggau pengudah pukul 8 pmalam,” ku Tuai Rumah Grace Itun madah ngagai pemberita ditu, kemari.

    Kenu ku iya, peranak rumah panjai suah sebana laban penanggul nya dikenatai ngagai iya.

    “Nama ulih digaga, kami udah nguji tang KKLW nadai nyaut kami.

    “Suba LAS madah ngagai kami nyema bisi belanja ari KKLW baru projek paip besai nya dipejalai lalu rumah panjai udah dirintai nerima projek nya.

    “Tang diatu udah beberap taun, enda patut lalu nadai bajet,” ku iya.

    Grace madah, ba taun nyin kemari bisi piak bejalaika tinjau ngagai rumah panjai sida, lalu madah projek bekaul enggau projek paip nya.

    Tang ku iya, nadai pengawa diadu udah nya lalu nya mandangka pengarap deka ngasaika projek nya majak puntan lalu kami deka ngasaika penanggul ke nadai nemu abis.

    “Entali paip ke dikena kami diatu semina mesai lengai anak mit, dini chukup dikena kami ke mayuh tubuh.

    “Enti suban engka ulih tang laban rayat rumah panjai ke udah betambah paip nya enda muat agi.

    “Nyangka 20 taun tauka belasan taun suba, paip nya ulih diguna,” ku iya.

    Iya madah, sida agi ngena pelin paip lama ke diguna lebih 20 taun ke udah.

    “Kami minta pengasih piak bekaul lebih agi KKLW ngelengkaska projek nya.

    “Abis nadai terang ngagai kami status projek nya, nama kebuah nyau betaun-taun ke nganti,” ku iya.

    Dulu ari nya, iya muji ulah Ketuai Nembiak Parti SUPP Bukit Assek Kaunselor Joseph Chieng ke mantu peranak Jalai Salim-Stabau minta tiang telekomunikasyen.

    “Sitak tu nadai bulih arus telekomunikasyen taja semina 15 minit penayuh ari mengeri besai.

    “Kami chukup begunaka arus tekomunikasyen enggau Internet ditu,” ku iya.

    Chieng nguluka sekeda peranak Jalai Salim-Stabau bisi ngelawa Opis Telekom Malaysia Sibu enggau opis Komiti Komunikasyen enggau Multimedia Malaysia (SKMM) Sibu ngenataika penanggul ke ditapi peranak menua nya.

    “Sepuchuk surat petisyen disain urung 200 peranak mena nya udah dianjung ngagai opis SKMM di Sibu.

    Grace ngarap Chieng terus mantu sida di menua nya minta pekara ke beguna ngagai pengidup ninting hari.

    “Aku ngarika kami serumah, deka meri terima kasih besai ngagai Chieng laban ke udah bebendar mantu kami.

    “Ngarapka juluk kami sereta bala anak ngelama tu ulih nyadi nyata,” ku tandu iya. #UtusanBorneo

    No comments

    Post Top Ad