Header Ads

  • Berita Tebaru

    Penanggul nyual asil betanam betupi nengeri deka teputar

    Datuk Amar Douglas Uggah
    MANRED deka nempa kerejasama enggau kompeni besai ke ulih meli semua asil betanam betupi ari nengeri tu.

    KUCHING: Perintah Nengeri nengah Opis Menteri Betanam Betupi Moden, Tanah Adat enggau Pemansang Kandang Menua (MANRED) deka nempa kerejasama enggau mayuh agi kompeni besai ke ulih meli semua asil betanam betupi ari nengeri tu.

    Sapit Kepala Menteri Datuk Amar Douglas Uggah madah nya siti model ke engkeman pengudah mujur nyain MoU enggau Top Fruits (Sarawak) Sdn Bhd ba bulan November 2017.

    “Orang bekebun kitai regas gawa, sida nurun pukul 5 pagi pulai pukul 5 lemai. Nambahka nya kitai bisi mayuh tanah tang kitai napi penanggul ngiga makit endur nyual semua asil tu.

    “Penanggul tu ditapi ketegal kitai nadai penyambung ba rentayan pemekal lalu pekara tu balat diperundingka kitai.

    “Chara ke pemadu manah dikena mutarka penanggul tu iya nya nempa kerejasama enggau kompeni besai,” ku iya.

    Uggah mansutka jaku nya ba Makai Lemai Apresiasi MANRED ke diatur di sebuah hotel ditu, malam ensanus.

    Uggah ke mega Menteri MANRED nambah, kompeni besai ke dipilih nya meseti ngembuan peneleba ba semua aktiviti ke bekaul enggau pengawa betanam betupi.

    Ke pemadu beguna ku Uggah, kompeni nya meseti bisi makit ungkup semua produk betanam betupi nengeri tu.

    “Baka musin buah rian diatu, sida (Top Fruits) udah meli. Reti nya kitai udah bisi kompeni meli, diproses sereta dianjung ngagai makit luar.

    “Tu mih model ke mujur lalu diatu kitai ngiga kompeni bukai ke tau nyadi kompeni besai ungkup produk kitai.

    “Nengah model tu kitai nyadang ulih nyadi pemekal pemakai ke pemadu besai manggai ba taun 2020 seraris enggau juluk Kepala Menteri,” ku Uggah.

    Nengah MoU ke disain, Top Fruits (Sarawak) Sdn Bhd deka nusun aktiviti di Palan ‘Individual Quick Freezing’ (IQF) di Tarat, Serian ke udah diubah nyadi palan ngumpul, memproses enggau mungkus.

    Makai lemai MANRED malam nya ngerami pemindah ex-Sekretari Mendam MANRED Buckland Bangik ke Unit Pemerambu Nengeri (SPU) ke alai iya deka mangku pengawa ny adi Direktor SPU.

    Bela dikerami Ir. Ahmad Denney ke mindah lalu mangku pengawa nyadi Residen Pelilih Limbang enggau Noraini Morshidi sereta Lula Jatim ke bela mindah ngagai SPU.

    Bela bisi datai Menteri Muda Betanam Betupi Dr Abdul Rahman Ismail, Sekretari Mendam MANRED Datu Ik Pahon enggau Direktor SALCRA Datu Vasco Sabat Singkang. #UtusanBorneo

    No comments

    Post Top Ad