Header Ads

  • Berita Tebaru

    Penerang ti nyaruka runding bekaul NCR patut dikemetul

    Tan Sri Datuk Amar Dr James Masing
    KUCHING: Sapit Kepala Menteri Tan Sri Datuk Amar Dr James Masing madah, tanah adat bansa asal Dayak (NCR) diulih orang ti tuai kelia nengah ‘darah, peluh enggau ai mata’, nya alai anang saru runding enggau baka ke diberi perintah.

    Ketegal nya iya enda setuju enggau penemu siku ketuai ke landik ba sejarah laban ti enda meretika fakta sejarah bekaul tanah NCR di Sarawak.

    “Pekara ti dikenataika iya maya Aum Ketuai Raban Bansa  bekaul Pemakai Menua enggau Pulau Galau (PMPG) sebedau tu udah nyaruka runding sereta tau nempa penyarut ba bansa Dayak enggau Melayu. Baka ke dalam sejarah, iya  patut nemu fakta ke betul. Nya alai kitai ngarapka iya ngemetulka anggap ke salah sentang isu tanah NCR Dayak,” ku Masing madah ngagai The Borneo Post ditu kemari.

    Masing ke mega Presiden PRS madah, pekara ti deka dikereja perintah nengeri diatu iya nya nguji ‘ngemetulka  iya ke salah’ ngambika pengempu tanah NCR bulih pala tanah ke disempulang enggau enakmen komprehensif undang – undang ti diperambu ke deka dipejuraika ba Aum Kunsil Nengeri dalam bulan Julai taun tu ila.

    Kepala Menteri Datuk Patinggi Abang Johari Tun Openg nerangka perintah nengeri enda tau enda ngiga chara mutar ke komprehensif isu tanah NCR nengah pengereja pengawa khas ti betuaika Sapit Kepala Menteri Datuk Amar Douglas Uggah Embas.

    Ba aum pengarang berita  pengudah bejadi pengerami nya,Abang Johari ngaku laban nadai jalai pansut  ba undang – undang ke diatu bekaul tanah NCR, nya kebuah perintah enda tau enda bisi chara mutarka nya nengah chrara nyendiaka ‘force of law’ ngagai pengempu tanah  NCR di Sarawak.

    Jalai pansut dalam Kod Tanah Nengeri udah tebantai dalam pemutus Kort Perintah Besai  kena bulan Disember 2016, ke alai adaat bansa asal “Pemakai Menua” enggau “Pulau Galau” nadai diterit dalam undang – undang di Sarawak. Kort tinggi udah ngemendarka apil ari Opis Kampung enggau Perintah Nengeri ba kes ti difail Tuai Rumah Sandah Tabau enggau tujuh agi ke bukai pengempu tanah NCR dalam kandang menua di Ulu Machan, Kanowit.

    Ba pekara ke bekaul, Masing ke mega Menteri Pemansang Infrastuktur enggau Perengka Pengangkut ngelalau bala tuai rumah ngambika anang belalai  lebuh ngemansangka tanah NCR sida nengah sebarang projek ngemansang tanah begulai (JV) dikena nyeliahka sida diambi tauka bisi bekaul enggau kort.

    Berebak enggau nya, ba penerang ti dipansutka sekretariat ba aum PMPG kena 21 Januari  2018, perintah udah ngemendarka 1.2 milion hektar tanah nengah pengawa nyukat kelingi, lalu ari penyampau nya, 833,000 hektar udah tembu disukat, ke alai 656,000 hektarudah digazet.

    Nambahka  nya, lebih 17,000 lot ke mungkur 20,000 hektar lot individu udah disukat.

    Mega dibantai, ari baruh Bajet Perintah Besai 2018, RM30 milion udah diungkup dikena bejalaika pengawa nyukat kelingi tanah NCR di Sarawak. #UtusanBorneo

    No comments

    Post Top Ad