Header Ads

  • Berita Tebaru

    Pengawa nanam baru kayu semina udah mujur 30 peratus

    Datu Len Talif Salleh
    KUCHING: Perintah deka meda baru strategi dikena nyapai juluk nanam baru kayu ba kandang endur satu juta hektar pemesai lebuh manggai taun 2020.

    Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah, dikena nyapai juluk nya perintah patut lebih realistik.

    “Juluk kitai sebedau tu deka nyapai satu juta hektar kandang endur ditanam baru kayu lebuh manggai taun 2020, tang naka ke diatu kitai semina udah mujur nanam lebih 300,000 hektar tauka semina 30 peratus aja.

    “Dikena nyapai juluk nya kitai patut lebih realistik, nya alai kitai patut meda baru nama penanggul ke nyadi.

    “Kitai patut meda nama penanggul baka bekaul enggau isu tanah sereta orang gawa. Isu teknikal baka milih kayu tauka bansa kayu ke patut ditanam kitai nadai penanggul,” ku iya lebuh dikerandau raban pengarang berita.

    Dulu ari nya Len nyuaka setipikit Program Latihan Pemuliharaan (CIP) ngagai 15 iku pelatih ke diatur Sarawak Forestry ba sebuah hotel ditu, kemari.

    Berebak enggau tu iya madahka Sarawak deka nempa kerejasama enggau organisasyen antarabansa bekaul enggau pengawa nanam baru kayu nya, nengah pengawa mansik.

    “Kena 25 tu ila (Januari) kitai deka nyain sempekat pemereti ati enggau institusyen Finland lalu beserakup enggau sida bejalaika pansik ba ubah gaya hari enggau ke bukai,” ku iya.

    Kelimpah ari nya lebuh ke bejaku ba pengerami nya, Len madahka perintah mega begunaka saup sereta sukung mayuh ejensi, opis sereta gerempung ukai dikuasa perintah.

    “Dikena nyapai juluk ‘Pengurusan Kelestarian Hutan’, perintah enda ulih kediri.

    “Kitai (perintah) begunaka kerejasama entara kaban akademik, pengemeran industri enggau pengaga polisi nyengkaum NGO.

    Penyereta enggau saup ari kompeni sereta ejensi perintah amat beguna kelebih agi maya bejalaika nya, baka maya ngemansangka strategi pasal subjek, latih pakar enggau bekunsi pemansut.

    Sama bisi datai ba pengerami nya kemari, Pemangku Ketuai Pemesai Eksekutif, Sarawak Forestry Zolkipli Mohamad Aton, Manijar Besai Gerempung Kayu Sarawak  (STA) Dr Peter Kho enggau ke bukai. #UtusanBorneo

    No comments

    Post Top Ad