Header Ads

  • Berita Tebaru

    Pengudah 20 taun nuntut tanah NCR Kpg Sampadi, Sg Limo diakun Perintah Sarawak

    GAMBAR PENGIAS: Gempuru likun ba mua penama kort Miri taun 2009
    LUNDU: Pengudah pengelama 20 taun peranak Kpg Sampadi enggau Kpg Sg Limo enda mantul ngulihka hak ba tanah Adat Bumiputera (NCR), pengujung iya bulih pemujur pengudah bulih surat ngemendarka tanah nya.

    Pengirau ati sida udah dipending sereta dikemeratka Menteri Pengeraja Asal enggau rampa menua ke mega Kaban Parlimen Santubong Datuk Seri Wan Junaidi Tuanku Jaafar.

    Berengkah ari bulan Julai taun siti nyin tadi, pengawa kededua genturung pendiau nya udah udah diperati sereta dikemeratka Wan Junaidi ti ngujungka aum pengelama empat bulan diatur begulai enggau Opis Tanah enggau Survei (JTS) enggau peranak genturung pendiau nya.

    Asil ari aum nya, Wan Junaidi enggau Kaban Kunsil Negeri (ADUN) Tanjong Datu Datuk Jamilah Anu udah betemu enggau Kepala Menteri Datuk Patinggi Abang Johari Tun Openg, ngulihka penyilik pasal pekara nya.

    Abang Johari udah setuju ngemendarka tanah di Kpg Sampadi enggau Kpg Sg Limo nyadi Tanah Rizab Genturung Pendiau ari baruh Seksyen 7 Undang- Undang Tanah Negeri Sarawak.

    Ketuai Kpg (KK) Sampadi, Ambi Uri ti gaga ati enggau berita nya madah, pemutus ti digaga kepala menteri ti nentuka pengempu tanah ba genturung pendiau nya nyamin tanah nya bisi ke ungkup rebak dudi ila.

    Sapit Chairman Komiti Pemansang enggau Pengelikun Genturung Pendiau (JKKK) Kpg Sg Limo, Goh Kim Chong bela berasai gaga ati sereta meri terima kasih ngagai kepala menteri, Wan Junaidi enggau Jamilah kerana laban udah ngarika peranak genturung pendiau nya.

    Berebak enggau nya Wan Junaidi madah, pemutus nya mandangka perintah Barisan Nasional (BN) Sarawak ti diiring Abang Johari ngemeratka pengidup enggau pengelantang pendiau rayat.

    “Terima kasih YAB Kepala Menteri ketegal penyiru nuan lalu pemutus tu amat ngagaka ati.

    “Aku arapka peranak menua nya meri kerejasama ngagai JTS maya pengawa nyukat dipejalaika ila dikena nentuka kerja proses netapka tanah nya nyafi tanah rizab ulih dipejalaika enggau lengkas,” ku iya.

    Empai lama, Sekretari Politik Menteri Pengeraja Asal enggau Rampa Menua Dato Sri Syed Hamzah Syed Paie udah nyuaka surat padah ngemendarka tanah ngagai pengari peranak Kpg Sampadi enggau Kpg Sg Limo di Masjid Kpg Sampadi. #DayakDaily

    No comments

    Post Top Ad