Header Ads

  • Berita Tebaru

    Penyampau RT di Sarawak deka ditambah ngagai seribu unit

    Dato Sri Fatimah Abdullah
    KUCHING: Rukun Tetangga (RT) ari baruh pegai Opis Penyerakup Integrasi Nasional (JPNIN) deka nambahka pemayuh RT sida ngagai seribu unit di seluruh menua Sarawak.

    Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madahka maya bisi ubah ba rintai kabinet taun 2017, opis menteri nya bisi ditambah tanggung pengawa, dipasukka pekara ‘Pengelantang Komuniti’ (Komuniti).

    “Siti ari pemerat dalam pekara nya, solidariti, ngambika kami ulih bekerejasama betatika bisi penyerakup dalam komuniti ke datai ari mayuh macham pupu bansa.

    “Di Sarawak, pekara tu berat amat ngambika kitai ulih terus mansang, ngemendarka perintah ngemansangka menua tu dalam tiap sukut, baik nya infrastruktur, politik, ekonomi,pengawa rama sereta pemerat bukai tang pemungkal nya enda tau enda bisi nya pemaik enggau solidariti dalam komuniti ari mayuh macham pupu bansa,” ku iya.

    Fatimah madah munyi nya lebuh bejaku ba aum media pengudah ngelaluka pemesai ari JPNIN ke digulu Direkor opis nya, Diwana Azool di opis menteri nya di Baitulmakmur ditu, kemari.

    Iya nandu baru madahka bepelasarka nya, opis menteri nya beratika penegap RT ari baruh pegai JPNIN, ke alai 976 udah ditumbuhka di serata menua Sarawak, lalu urung 24 agi deka digenapka nitihka pemerat sitak ke begunaka RT, ku iya.

    “Pemerat RT nya deka beratika bisi kaul ke manah entara komuniti, lalu pemayuh ari RT deka ditambah ngenapka penyampau 976 ngagai 1,000 RT dibuka di serata menua tu,” ku iya.

    Kena 3 Februari tu ila, Petronas nengah Tanggung Pengawa Rama Korporat (CSR) sida iya deka magi RM250,000.00 ngagai RT, ke deka diberi maya ‘Hari Terbuka Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, ti deka disua ulih Kepala Menteri Datuk Patinggi Abang Johari Tun Openg ngagai Diwana.

    Fatimah nandu baru madahka pemeri ari Petronas nya ila deka dikena ulih RT bejalaika pengawa sida iya kelebih agi beratika pemisi kaul ke manah ba entara komuniti nyengkaum ‘Skim Rondaan Sukarela’ (SRS) ke bejalaika pengawa sida iya nyaga pengelikun, ngurangka pengawa salah nyadi, nyengkaum penanggul dadah.

    Ba taun 2017 tu tadi, JPNIN ke baruh pegai Opis Perintah Besai, sebagi ari tanggung pengawa dipasukka ngagai KKKWKK (dikemata ulih opis menteri tu) ke ukai semina ngemata tang bejalaika aktiviti sereta program begulai enggau JPNIN, ke betatika penyerakup sereta solidariti.

    “Ba senentang tu, solidariti nyadi pemerat ba Perintah kelebih agi laban pemerat tu ngemendarka rayat sereta menua tu terus mansang,” ku iya.

    Ba lansa bukai, siti agi pemerat entara opis menteri nya enggau JPNIN, iya nya beratika pemisi pengelikun ke nyukung pengelantang pendiau komuniti.

    Di serata menua Sarawak, JPNIN ngembuan urung 496 SRS ke digaga ulih komuniti empu, laban bisi bukti madahka sekeda sitak, ke ngembuan penanggul pengawa salah baka kes (lepak), pechah rumah, dadah ulih dikurangka.

    Kelimpah ari nya, KKKWKK enggau JPNIN deka sama ngaga program meransang mayuh agi RT dibuka.

    “Kami begunaka tiap genturung pendiau, RT sida iya ngaga program ke bisi ngaul penyerakup ba komuniti nya nyengkaum genturung pendiau ke besepiak enggau sida iya,” ku iya lalu nandu baru madah bisi 6 program ke deka digaga bepelasarka kar genturung pendiau ke bedau kala ngaga.

    Nya alai ku iya, NGO ke bisi ba tiap genturung pendiau, ketuai sida iya tau ngulu kaban NGO ngaga pengawa ngangkatka penyerakup enggau pengelikun.

    “Pemisi sitak RT ke baru tu ila, NGO diperansang ngangkatka penyerakup sereta pengelikun di genturung pendiau sida iya.

    “Lalu baka nya mega,enggau raban korporat ke ulih nyukung pengawa penyerakup sereta pengelikun di menua tu, ngaga pengawa nya nyadi CSR sida iya... Kami sigi nyambut manah timbal ari korporat,” ku iya.

    Sama bisi enggau ngulu aum media nya kemari, Menteri Muda Pengelantang Pendiau Komuniti, datuk Francis Harden Hollis, Menteri Muda Orang indu, Ruang Bilik enggau Pemansang, Rosey Yunus,Sekretari Mendam opis menteri, Dr. Saadiah Samad, Direktor JPNIN, Diwana Azool enggau Pegawai kanan JPNIN, Neil Paul. #UtusanBorneo

    No comments

    Post Top Ad