Header Ads

  • Berita Tebaru

    Penyerakup bansa Bidayuh ngemansangka bansa dipuji

    Datuk Patinggi Abang Johari Tun Openg
    Penemu ngemansangka bansa enda ngira parti nya sebaka enggau penemu Deng Xiaoping maya numbuhka menua China.

    KUCHING: Penemu tauka philosophi beserakup enda ngira nama parti politik ti ulih mantu ngemansangka bansa diri enggau nengeri, patut dikemeran sereta dikemeratka.

    Kepala Menteri ti mega Chairman Barisan Nasional (BN) Nengeri Datuk Patinggi Abang Johari Tun Openg muji penemu raban bansa Bidayuh ti beserakup ngemansang bansa ti enda ngira bagi parti politik.

    Iya madahka penemu bansa Bidayuh sebaka enggau penemu Deng Xiaoping maya numbuhka menua China iya nya ‘i dont care whether the cat is black or white as long as it catches the mice’.

    “Orang Bidayuh enda ngira sekalika ari SUPP, PBB, PRS tauka PDP, tang ke pemadu beguna kita deka ngemansangka bansa Bidayuh, lalu udah tentu dalam perimeter ke betul.

    “Perimeter ke betul nya udah tentu eko-sistem politik kitai iya nya Barisan Nasional. Eko-sistem nya enda ngira sekalika SUPP, PRS, PDP tauka PBB, seagi bansa Bidayuh ulih mansang.

    “Nya kebuah aku arap bendar enti bisi penemu tauka philosophi ti baka nya kita ulih ngubah lanskap enggau sitak Bidayuh, ti ngemansangka orang Bidayuh,” ku iya seraya madahka bansa Bidayuh dulu agi ngemeranka penemu nya ari menua China.

    Abang Johari ke nyadi Presiden Parti Pesaka Bumiputera Bersatu (PBB) mansutka penemu nya lebuh bejadika Aum Pengari Pampang Tiga Taun Sekali Pampang PBB Zon 3 (N.18 Serembu, N.19 Mambong, N.20 Tarat, N.21 Tebedu, N.22 Kedup enggau N.23 Bukit Semuja) ti diatur ba Dewan DBNA ditu, kemari.

    “Dalam pekara tu kitai PBB amat betuah laban PBB ngemeratka ‘inclusiveness’ lalu nya alai ketuai kitai ari kelia nyentuk diatu kitai ngemeratka pasal penyerakup,” ku iya.

    Berebak enggau tu, Abang Johari lebuh ditanya baru pasal isu penyerakang penemu entara SUPP enggau serpihan parti, UPP, Abang Johari sekali agi madahka pekara nya dalam proses diputarka.

    Iya madahka formula dikena mutarka isu nya udah bisi taja pia bedau deka bekunsi.

    “Enda ibuh ku madah dulu ngagai nuan (pengarang berita), nya kereja aku enda ibuh dikunsi dulu , ila aku madah enti udah nyadi,” ku iya.

    Kelimpah ari nya lebuh ke dipinta ngenang pasal genap setaun nyadi kepala menteri, Abang Johari diri udah bejalaika mayuh inisiatif lebih agi bekaul enggau ekonomi.

    Entara polisi ke dipejalaika dalam timpuh setaun udah ku iya, nyengkaum ngangkatka infrastruktur asas, institusi wang, infrastruktur digital, latih, enggau ke bukai.

    “Dalam timpuh setaun ke udah aku bisi bejalaika inisiatif lebih agi polisi ekonomi, nya aku ngarapka dalam timpuh panjai nya amat ulih ngangkatka Sarawak ngagi tikas ke tinggi,” ku iya seraya madahka pengawa deka ngaga jematan Kemena, Sebauh enggau di Marudi pan udah dikemendarka.

    Sama bisi datai ngulu pengawa nya kemari, bini kepala menteri, Datin Patinggi Datuk Juma’ani Tun Tuanku Bujang, Sapit Kepala Menteri ti mega Pemangku Sapit Presiden PBB Datuk Amar Douglas Uggah embas enggau Datuk Amar Awang Tengah Ali Hasan, Sekretari Besai PBB tiu mega Menteri Utiliti Dato Sri Dr Stephen Rundi Utom, Naib Yang Dipertua Parti PBB ti mega Menteri Pelajar, Sains enggau Pansik Teknologi Dato Sri Micheal Manyin Jawong enggau ke bukai. #UtusanBorneo

    No comments

    Post Top Ad