Header Ads

  • Berita Tebaru

    Penyuntuk pengidup ditapi Rosi nerima perati ari SUPP pampang Piasau

    Datuk Sebastian Ting
    MIRI: Penyuntuk pengidup Rosi Migat, 75, ke diau ba sebuah rumah buruk ba Kampung Piasau Utara nerima perati ari Parti Sa’ati Rayat Sarawak (SUPP) Piasau, ditu lemai ensanus.

    Rosi diau begulai enggau dua iku anak indu iya sereta enam iku uchu ba sebuah rumah buruk ke digaga niang laki iya nerima penatai Kaban Kunsil Nengeri (ADUN) Piasau ke mega Chairman SUPP Piasau, Datuk Sebastian Ting.

    Nitihku Ting, piak iya deka mantu ngaga baru rumah ke udah buruk nya awakka meri pengelantang ngagai ruang bilik nya.

    “Rumah tu patut direrak laban udah kelalu buruk sereta tuduh ninting kali hari ujan lali kitai deka mantu sida ngaga baru rumah nya malai.

    “Kelimpah nya, kitai mega deka mantu Rosi minta batu ninting bulan ari Opis Pengintu Pengelantang Pendiau Raban Bansa (JKM),” ku iya.

    Sebastian madah, siku ari uchu indu nya enda ulih nampung pelajar laban ti kelalu suntuk belanja mega deka dibantu.

    “Semina siku uchu iya ke gawa lalu udah nya dua iku agi anak Rosi kereja ngumpul perengka dibuai dikena nupi sida sebilik lalu asil ari bejualka perengka ke dibuai nya sida bulih RM300 ngagai RM400 sebulan.

    “Dua ari enam uchu iya bela besekula iya nya ba pom empat enggau primari enam, semina siku uchu iya ngemaduka diri besekula ba pom dua taun tu laban ti kelalu suntuk belanja.

    “Nangkan nya, dua iku agi uchu iya agi mit. Kami deka mantu uchu  Rosi lalu ngaduka pekara sekula iya ba sekula sekondari ke besemak,” ku iya.

    PATUT DIGAGA BARU: Pendiau rumah Rosi ti patut digagaka baru.

    Berebak enggau nya, Ketuai Raban Bansa Genturung Pendiau Piasau Utara Hipni Sulong ke bela nyereta pejalai nya madah, Rosi nyau enda bepengerai diumba bisi penanggul enda tentu meda.

    Ku iya, sida Rosi sebilik diau ba rumah buruk ke ditinggalka niang laki iya semina bepanggai ngagai uchu lelaki sereta dua iku anak iya ke indai tunggal gawa nupi sida semilan iku. #UtusanBorneo

    No comments

    Post Top Ad