Header Ads

  • Berita Tebaru

    Perambu ngemansangka projek grid ai menua pesisir disukung

    Usat Bilong
    MIRI: Agih belanja RM1 bilion ti dikemendar dikena ngemansangka renggat keterubah grid ai menua pesisir nerima timbal manah ari peranak menua pesisir.

    Siku peranak Long Sepiling Tinjar Baram, Kalang Jok madah, bekal ai beresi enggau kuasa karan endang beguna endar ngagai peranak menua pesisir.

    Ku iya, peranak tentu lantang ati mendingka pekara dibantaika Kepala Menteri Datuk Patinggi Abang Johari Openg kemari bekaul enggau pengawa ngemanahka sistem bekal ai menua pesisir.

    “Kitai berasai lantang ninga agih belanja RM1 bilion dikena ngemanahka sistem bekal ai nengah chara grid ai nengeri,” ku iya ditu, kemari.

    Ku Kalang, tebal agi genturung pendiau enggau rumah panjai di Tinjar Baram endang nganti projek bekal ai ti diberi berenggat.

    “Perambu ngelekat grid ai ari Tekat Ai Batang Ai ngagai Tanjung Manis lalu ke utara nengeri tu endang formula pemadu manah mutarka penanggul bekal ai beresi menua pesisir,” ku iya.

    Kalang ke mega chairman PBB Marudi madahka rumah panjai di sitak iya ngaul 70 pintu mega bisi minta bekal ai enggau kuasa karan.

    “Kitai endang ngarap endar dua perengka guna pemun tu disambung ngagai rumah panjai kitai baka ti udah disebut Abang Johari,” ku iya.

    Bekunsika penemu sama, Usat Bilong ari Long Banga, Baram ngarapka pemansang renggat keterubah grid tu dirumban ungkup pemaik peranak.

    Ku iya, peranak udah nganjung peminta ngagai perintah besai ba projek bekal ai beresi tang enda ulih dipejalai ketegal bisi penekul ba pekara belanja.

    Usat ke mega Ketuai Nembiak PBB Mulu madahka rumah panjai ke bisi 100 pintu nya nyentuk diatu nadai ngembuan bekal ai beresi.

    Kenu ku iya, lima genturung pendiau iya nya di Long Peluan, Long Lamai, Long Balong, Long Beruang nyengkaum Long Banga nadai ngembuan bekal ai beresi.

    “Kitai ngarapka pengawa ngemendarka agih belanja RM1 bilion tu ulih meri ubah ngagai peranak kelebih agi ngasaika perengka guna pemun sebaka enggau di mengeri,” ku iya. #UtusanBorneo

    No comments

    Post Top Ad