Header Ads

  • Berita Tebaru

    Perintah dekaka begunan projek besai dipansik tikas pengetan

    Tan Sri Datuk Amar Dr James Jemut Masing
    Berindik ari tu perintah begunaka raban profesional sereta kaban akademik ngaga pansik ba begunan ngambika tan lama.

    MIRI: Perintah begunaka raban profesional enggau kaban akademik bejalaika pansik ba pengetan begunan enggau infrastruktur ngaul projek besai.

    Sapit Kepala Menteri, Tan Sri Datuk Amar Dr James Jemut Masing madahka Sarawak kandang diatu benung ngaga Jalai Besai Pan Borneo 1,089 kilometer penyauh.

    Ungkup pengawa tu ku iya, pansik enggau profesional kaban akademik beguna endar nentuka semua projek ngaga begunan enggau perengka pengangkut tan lama sereta teguh.

    “Malaysia diatu nyingkang ngagai menua mansang ke alai tanggungpengawa berumah enggau injinir struktur deka mai ubah besai ngagai rampa menua,” ku iya.

    Jaku iya dibacha Menteri Muda Jalai Tebing Pantai Sarawak, Datuk Julaihi Narawi rambau ‘Persidangan Ketahanan Bangunan dan Infrastruktur Antarabangsa’ (DuraBI 2018) kemari.

    James ke mega Menteri Pemansang Infrastruktur enggau Pengangkut madah beguna endar ngiri penemu enggau pemansik bidang akademik ke dalam industri.

    “DuraBI 2018 ngempuruka kaban akademik enggau profesional ngambi mantaika pansik enggau tempa sida dalam industri ti ngaul pengawa ngaga begunan enggau infrastruktur,” ku iya nerang.

    James mega meransang bala kaban akademik, pemansik tauka profesional ngena penemu sida ngangkatka pemansang infrastruktur di Sarawak.

    “Opis menteri aku sedia berandau tauka merambu ngemansangka perengka guna infrastruktur enggau pengangkut ngambika sebaka enggau nengeri ke bukai,” ku iya.

    Ku James, sambung jalai alun nyadi seput ngidupka kaul rayat ari siti menua ngagai menua ke bukai.

    Berindik ari nya, pengawa ngaga jalai besai Pan Borneo dipelaba tembu pun taun 2022 ila deka ngemai pangka besai ngagai rampa Sarawak kelebih agi ekonomi.

    James mega muji pengawa Universiti Curtin Malaysia, Universiti Hanyang, Institut Penyelenggaraan dan Pemeriksaan Struktur Korea sereta pengatur program ti udah ngemujurka DuraB1 2018.

    Sama bisi datai Sapit Pro Canselor Universiti Curtin Malaysia, Beena Giridharan, Chairman Pengatur DuraB1 2018 Universiri Curtin Malaysia, Mohamed A Ismail, Chairman Pengatur Institut Penyelenggaraan dan Pemeriksaan Struktur Korea, NamGi Lim, Sekretari Mendam Opis Menteri Pemansang Infrastruktur enggau Pengangkut, Datu Safri Zainuddin, enggau Dekan Fakulti Kejuruteraan dan Sains Universiti Curtin Sarawak, Ir.Profesor Lau Hieng Ho. #UtusanBorneo

    No comments

    Post Top Ad