Perintah dipinta ngaga jalai ari Marudi terus ke Brunei, ku Chua -->
Cari Berita

Advertisement

Perintah dipinta ngaga jalai ari Marudi terus ke Brunei, ku Chua

Admin | beritaiban@gmail.com
January 24, 2018

Kapitan Chua Sing Yong
MARUDI: Chairman Balai Dagang China Baram, Kapitan Chua Sing Yong minta perintah ngaga jalai alun ngagai garis entara menua Brunei Darusalam di Pos Labi, besemak enggau rumah panjai Ulu Ridan.

Jalai ti disebut iya nya nengah Jalai Ulu Ridan ari simpang Sungai Pasir ditu, lalu ngelawa Palan Imigresyen Labi di Brunei Darusalam (sebedau tama ke Tutong, Brunei).

Nitih ku Chua, enti sema perintah ulih ngaga jalai nyambung Marudi terus ngagai Palan Imigresyen Labi di menua sepiak nya, lalu tu tau mantu ngerichahka agi ekonomi peranak di pasar nya.

“Ari pemisi jalai tu, nya tau nyadi peransang ngagai ekonomi Pasar Marudi berindik ari mayuh temuai ari menua sepiak datai terus ngagai Marudi meli bemacham produk menua tu tauka asil kampung baka kraf jari, pemakai ke diinjin enggau ke bukai,” ku iya nerang silik.

“Kitai mereti sereta sedar belanja ngaga jalai tu besai nyema perambu tu dikemendar, kelimpah ari pengawa berandau antara kekedua perintah menua, tang enti diperati pemanah pangka nya sereta ungkup timpuh panjai, tu siti pengawa beranakka puku ti mai penguntung,” ku iya nambah.

Chua mantaika perambu nya rambau program randau antara komuniti China Marudi begulai enggau Menteri Muda Kaunsil Kandang Menua ke lalu nyadi Kaban Kunsil Nengeri (ADUN) Marudi, Datu Dr Penguang Manggil, di bilik aum Kaunsil Pelilih Marudi ditu.

Ba lansa bukai, Chua mega mantaika sebana pasal penanggul parit besai di kandang Kampung Cina ditu, ti patut dikemanah berindik ari gaya pemabu parit sereta suah nakung ai maya hari ujan, ngujungka bah tunggal nyadi, tetiap kali musim landas datai.

Kelimpah ari nya ku iya, jalai alun ngelawa genturung pendiau nya mega patut dikemanah baka endur ke bukai.

Berebak enggau nya, Kapitan William Lim ari Kampung Pemindahan ditu mega minta raban bekuasa menua di Marudi ngemanahka jalai di sepanjai Kampung Pemindahan ngelawa stesyen SESCO lama ditu, suah rusak sereta belubang.

“Penanggul tu nyadi ketegal lori ngangkut tanah ngagai ladang mit di Kampung Cina.

“Pemerat tanah ke diangkut ukai semina ngerusakka jalai tang mega ngeruga pengelikun pengguna betengahka jalai, laban deriba lori baka mekit pangan diri, nadai ngira pengelikun orang bukai,” ku Lim nerang.

Berindik ari nya, iya merambu ngambika jam belepa lori nya iya nya antara pukul 1 ngagai pukul 2 lemai, meri awak ngagai bala nembiak sekula pulai jam nya.

ENDA LIKUN: Gaya jalai ke rusak ketegal pemerat lori ngangkut tanah nengah jalai di Kampung Pemindahan, Marudi, ti patut dikemanah enggau lengkas.

Ba lansa ke bukai, Pemesai Pelilih Marudi, Mackos Sibong deka berandau enggau raban kunteriktor bekaul enggau isu nya ngambi meri kerejasama ngetuka jam gawa sida maya jam sekut sereta netapka tatak pengelaju lori nya, ungkup pengelikun pengguna bukai.

Lebih 30 iku komuniti China datai ari bala ketuai komuniti enggau chairman serakup China sereta bala kaban iya.

Sama bisi datai ngulu program nya Chairman Kaunsil Pelilih Marudi (MDM), Edward Mendai sereta Pemesai Pemadah Marudi, Joseph James. #UtusanBorneo