Header Ads

  • Berita Tebaru

    Perintah enda ngaga pemutus sengapa bekaul industri teksi

    Dato Sri Nancy Shukri
    ‘E-hailing’ udah dipansik enggau silik lalu ditumbuh ngambika nyadi pelasar endur besemekih enggau manah dalam industri teksi: Nancy.

    KUCHING: Perintah enda ngaga pemutus sengapa tang bepelasarka fakta sereta mansik enggau silik ke udah dipejalaika nyengkaum pengawa numbuhka sistem ‘e-hailing’ dalam industri teksi.

    Menteri ba Opis Menteri Besai, Dato Sri Nancy Shukri madahka, tuju perintah ti numbuhka operasyen nya ukai ketegal deka ngemuntanka pengemeran industri baka ti dipadahka sekeda orang.

    Tuju iya dikena nentuka pengelikun orang tambang enggau penguna jalai alun bukai seraya ulih ngadaka sida besemekih enggau manah dalam industri teksi menua tu.

    “Kebuah kami ti muka e-hailing beoperasyen dalam industri teksi laban perintah udah mansik ari genap sukut.

    “Nyadi Perintah ti bisi tanggungpengawa, kami enda ngaga sesebengkah polisi sepeneka ati tang patut bepelasarka fakta enggau pansik ti silik nyengkaum semua pekara dalam industri nya empu,” ku iya nengah seiti penerang ngagai Utusan Borneo, kemari.

    Iya mega madahka pekara nya udah dikemerat ba Dewan Rakyat sebedau tu.

    Nitihku iya bepelasarka fakta ke diulih ari asil pansik, penelitian enggau makmal ke udah dipejalaika, ngayanka lebih 50 peratus penguna tauka orang tambang teksi di Malaysia ngena mobile apps dikena ngulihka servis teksi, lalu semina 14 peratus ari deriba teksi ti ngena mobile apps dikena ngiga orang tambang.

    Nya nyata bendar bisi bida besai entara peminta enggau servis ke disediaka nengah mobile apps sereta rugi bendar deriba enti nyema sida nadai orang tambang ketegal chara nyendiaka servis ulih deriba teksi ti ‘not connected’ enggau peminta orang tambang.

    Trend tauka chara ngiga teksi udah berubah setipak enggau segang pemansang, ku iya.

    Ku iya, lebih 70 peratus ari lebih 45,000 responden pansik deka ke servis e-hailing dikemendar sereta diperati.

    “Asil pansik ngayanka 59 peratus ari sida ke ngena e-hailing baka UBER enggau Grabcar enda kala ngena servis teksi sebedau tu.

    “Reti iya bisi peminta tauka orang tambang baru dalam segmen tu. Kebendar iya tu peluang ngagai industri tu.

    “Nya alai, dawa ti madahka deriba teksi diatu lenyau orang tambang laban ‘dichuri’ deriba servis e-hailing, nya enda tentu betul,” ku iya.

    Ku Nancy, kitai enda patut meda servis e-hailing tu nyadi penanggul ngagai chara operasyen teksi lama (konvensional) tang patut diambi nyadika peluang deriba teksi sereta nyemelaka pengawa nyendiak servis nitihka peminta enggau ‘trend’ makit.

    Ensanus, pukul 9 pagi urung 237 iku deriba teksi gempuru ngena chara manah di mua DUN lama seraya mai poster, entara ke ditulis ngena leka jaku ‘Hentikan Uber dan Grab’ di Sarawak. #UtusanBorneo

    No comments

    Post Top Ad