Header Ads

  • Berita Tebaru

    Perintah nengeri dipinta ngemeratka industri minyak enggau gis

    Datuk Gerawat Gala
    Pemansang dalam industri minyak enggau gis di Sarawak deka nentuka mayuh pemaik ungkup rayat kelebih agi di Miri.

    MIRI: Kaban Parti Pesaka Bumiputera Bersatu (PBB) Zon 10 Miri ngandalka Kepala Menteri Datuk Patinggi Abang Johari Tun Openg bisi berundingka pekara ti engkeman dikena nentuka pengawa dagang ungkup industri minyak enggau gis peranak Sarawak meruan regas sereta sektor nya tumbuh besai sereta mansang.

    Sapit Speaker Aum Kunsil Nengeri (DUN), Datuk Gerawat Gala madah pemeranak puku baru dalam industri ti nangkan udah nyediaka mayuh agi pengawa puang sereta awak dagang ungkup peranak di Miri, lalu tu deka mai mayuh pengandal di Miri dudi hari.

    “Tebal agi ekonomi peranak di Bagi Menua Miri endang bepanggai ba pemansang industri minyak enggau gis kenyau ari pun abad ke-19 dataika diatu.

    “Berindik ari pengelabuh industri minyak enggau gis dalam kandang beberapa taun ke udah, bala kaban parti kitai di Bagi Menua Miri ngapil ngagai Kepala Menteri enggau perintah nengeri bejalaika pengawa ti patut dikena nagang pengelabuh ekonomi sereta nagang bala pedagang enggau pekereja di menua tu lenyau penatai pemisi,” ku Kaban Kunsil Nengeri (ADUN) Mulu madah dalam jaku dipansutka rambau penagwa bejadika aum diligit tiga taun sekali PBB Zon Miri di sebengkah hotel ditu, kena Hari Minggu tu tadi.

    Sama bisi datai baum bala ketuai ari lapan pampang PBB Zon 10 iya nya ADUN N71 Bekenu Rosey Yunus, Ripin Lamat (N72 Lambir), Kaunsilor Mohamad Sardon Zainal (N73 Piasau), Abu Bakar Amit (N74 Pujut), Kaunsilor Julaihi Mohamad (N75 Senadin), Kaunsilor Kalang Jok (N76 Marudi), Dennis Ngau (N77 Telang Usan) enggau Gerawat N78 Mulu sereta mega bala kaban exco zon sereta bala kaban ke bukai.

    Kelimpah ari bejadika aum diligit PBB Zon 10, mega bisi diatur pengawa dipenyadi Abang Johari dikena nyediaka bala diligit ngulu Aum Besai Bala Pengari Parti ti deka diatur dalam bulan Febuari.

    “Kitai ditu rindu amat mendingka jaku lalau sereta mandat ari presiden kitai. Tu pemerat ba pemujur aum besai ti deka datai.

    “Pengawa sehari tu mega siti ari pengawa kitai nyediaka diri napi Pengawa Bepilih Besai Ke-14 (PRU14) ke alai juluk parti tulang belakang Barisan Nasional (BN) Sarawak deka menang besai dikena ngenegapka agi penuduk kitai dalam BN di nengeri tu sereta renggat nasional,” ku Gerawat ke lalu nyadi kordinator Zon 10.

    Gerawat nyemetak madahka pengawa sehari nya mega dikena nyediaka pelasar ngagai bala diligit mendingka mandat ari presiden parti belalauka pengawa parti nyediaka diri napi PRU14.

    “Pampang kitai ari Zon 10 seruran sedia enggau raban gawa bepilih begulai enggau parti komponen BN ke bukai napi PRU14 sereta deka bebendar gawa ngetanka penusuk parlimen BN.

    “Juluk kitai ukai semina deka ngetanka penuduk BN ke bisi diatu, tang kitai deka bebendar agi gawa enggau parti komponen BN ke bukai di Miri ngambi pulai baru penuduk parlimen Miri ke diatu dipegai penyakal,” ku iya.

    NGANGKATKA INDUSTRI MINYAK ENGGAU GIS: Gerawat (lima kiba) nyuaka tepa ngagai Abang Johari, seraya dikemata bala bukai.
    Berebak enggau pengawa nya, Gerawat mega udah madahka juluk sereta resolusyen ke udah digaga bala kaban PBB Zon 10 ngagai kepala menteri sereta bala ketuai kanan parti.

    Entara pekara nya nyengkaum bala kaban parti PBB Zon 10 nyukung ketuai dipegai presiden sida ke lalu nyadi kepala menteri.

    “Kami endang nyukung pemutus Kaunsil Supreme (MKT) parti ngetanka Abang Johari nyadi presiden PBB Sarawak enggau enda ibuh diperebut maya konvensyen parti ti deka datai.

    “Tambah mega, kami nyukung pemutus MKT parti kitai ba kededua pangku pengawa sapit presiden ke diatu ngetanka penuduk sida enggau nadai diperebut sereta mega pangku pengawa ketuai indu enggau sayap nembiak enda diperebut dalam TGM,” ku iya.

    Gerawat mega besemaya sukung ngagai presiden parti enggau MKT ba semua pengawa dipejalai dikena ngambi pulai hak enggau pengelebih Sarawak baka ke udah bisi disempekat dalam Sempekat Malaysia 1963 ari perintah besai.

    “Kami nyukung polisi presiden nampung pengawa ngemansangka kandang menua pesisir. Pengawa kepala menteri numbuhka Ejensi Pemansang Tanah Tinggi (HAD) dikena ngerumban pemansang di menua ulu di Bagi Menua Miri endang disukung peranak kitai di menua ulu dikena ngenyampatka pejalai pemansang kandang menua tu, enda jauh tinggal di belakang dibanding enggau kandang mengeri,” ku iya nambah.

    Bisi 1,200 iku datai ari bala kaban Kaunsil Supreme, kaban exco, kaban parti, bala pemerati ari lapan pampang PBB Zon 10, iya nya Bekenu, Lambir, Piasau, Pujut, Senadin, Marudi, Telang Usan enggau Mulu, ngulu pengawa nya.

    Presiden PBB Abang Johari, Sapit Presiden Datuk Amar Douglas Uggah Embas enggau Datuk Amar Awang Tengah Ali Hasan, Sekretari Besai Dato Sri Dr Stephen Rundi Utom, Chairman Mendam Datuk Amar Asfia Awang Nassar, Sapit Ketuai Indu PBB Datuk Fatimah Abdullah enggau Mandal Presiden PBB Datuk Talib Zulpilip, bala kaban kaunsil supreme enggau kaban kaunsil supreme indu, Kaban Parlimen (MP) Sibuti Datuk Ahmad Lai Bujang, bala menteri enggau menteri muda, ADUN, sekretari politik kepala menteri sereta sekeda bala ketuai raban bansa antara sida ke bisi datai. #UtusanBorneo

    No comments

    Post Top Ad