Perintah ngagihka RM1 bilion ungkup projek SGW - Berita Iban Online

Header Ads

  • Baru Nyadi

    Perintah ngagihka RM1 bilion ungkup projek SGW

    DEKA TEPUTAR: Abang Johari bejaku ngagai raban deligit Zon 4 PBB sentang pengeran Perintah Nengeri mutarka isu ai.
    Bekal ai ungkup projek ‘State Grid Water’ tu deka diambi ari palan tekat ai Batang Ai, ku Abang Johari.

    KUCHING: Perintah Nengeri setuju ngagihka belanja RM1 bilion dikena ngaga projek ‘State Grid Water’ (SGW) ungkup menua pesisir.

    Kepala Menteri Datuk Patinggi Abang Johari Tun Openg madah bekal ai ungkup projek tu deka diambi ari palan tekat ai Batang Ai.

    Iya pechaya ‘State Grid Water’ ulih mutarka penusah suntuk bekal ai ke suah ditapi sekeda genturung pendiau di nengeri tu.

    “Aku udah netapka pemutus ngaga ‘State Grid Water’ ungkup menua pesisir. Nengah projek tu, kitai nyendia paip besai ngambi ulih ngambi bekal ai ari Batang Ai.

    “Ngelamatu, kitai ngambi bekal ai ari sungai ti kekadang nadai bekal ai.

    “Maya pengawa bepilih, semua ngenataika sebana nadai ai. Orang Sebuyau madah nadai ai, orang Simunjan madah nadai ai.

    “Ninting kali pengawa bepilih nadai ai,nama penyadi tu...! Paip bisi tang nadai ai,”ku iya.

    Abang Johari mansutka jaku nya rambau bejadi Aum Besai Delegit Zon 4 Parti Pesaka Bumiputera Bersatu(PBB) ke diatur di Dewan Komplek Islam ditu, kemari.

    Abang Johari ke mega Presiden PBB nambah Sarawak enda ulih nganti Kuala Lumpur mutarka pemar nya ketegal isu nya udah kelalu lama.

    “Aku udah semilan kali nempuh pengawa bepilih.Nemuai ke menua pesisir nadai ai. Nemuai ke Kabong, Simunjan nadai ai. Ke amat ai kitai mayuh tang nadai.

    “Diatu aku nyadi kepala menteri, aku deka mutarka pemar tu lalu kitai bisi chara ngiga belanja iya nya nengah Bank Pembangunan Sarawak(DBOS),’ku iya.

    Nitihka penerang Abang Johari, fasa keterubah projek nya deka mekal ai ari Batang Ai ke Tanjung Manis lalu disadang diadu dalam timpuh dua taun tu.

    Nangkanka nya, fasa kedua deka berengkah lalu deka ngambi bekal ai ari palan tekat ai bukai di nengeri tu.

    Sarawak bisi empat palan tekat ai iya nya Batang Ai, Bakun, Murum enggau Baleh.

    Iya madah projek nya ukai semina mekal ai ngagai genturung pendiau tang bela diguna ba pengawa betanam betupi.

    “Aku enda ulih agi nganti sida ari Malaya mutarka pemar tu. Lakka orang Sarawak ngaga lalu kitai berengkah maya aku nyadi kepala menteri,” ku Abang Johari. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads