Header Ads

  • Berita Tebaru

    Perintah ransing ngetanka pengeraja asal, rampa menua

    Datuk Patinggi Abang Johari Tun Openg
    KUCHING: Kerejasama entara pakar Sarawak enggau Finland, ngayanka perintah chukup ransing ba pengawa ngetanka pengaya pengeraja asal enggau rampa menua di nengeri tu.

    Kepala Menteri, Datuk Patinggi Abang Johari Tun Openg madahka, Sarawak nempa kerejasama enggau menua Finland dalam pengawa ngintu pengetan rampa menua.

    Dalam atur deka bejalaika atur pengawa ngetanka rampa menua ku iya, perintah tetap ngemeratka pengawa ngalau sereta nyaga kampung asal kitai sereta deka nanam kayu di nengeri tu.

    “Dalam pengawa kitai deka ngenegapka ekonomi dalam industri kayu ramu tang berebak enggau tu mega kitai enggai ngeruga kampung jerung, nya ke pemadu beguna.

    “Berindik ari pekara nya, pakar kitai deka beserakup bejalaika pansik begulai enggau pakar Finland bejalaika aktiviti pemansang enggau pengawa pemansik pasal ngetanka rampa menua.

    “Polisi Finland amat manah, nya ke deka dipelajarka kitai ari sida iya kelimpah ari sida iya ke chukup tegap ba pengawa pemansik bekaul enggau atur pengawa ngetanka rampa menua,” ku iya dalam aum pengarang berita.

    Dulu ari nya Abang Johari ngemataka pengawa nyain sempekat pemereti ati (MoU) entara perintah nengeri enggau Natural Resources Institute Finland (LUKE), ke diatur ba Wisma Bapa Malaysia ditu, kemari.

    “Taja pan gaya iklim bebida tang kerejasama tu deka meri penguntung ngagai kededua piak, kitai ulih belajar ari sida lalu sida ulih belajar ari kitai,” ku iya seraya madahka Sarawak kaya ba pengeraja asal nyengkaum mayuh spesis ke ulih dipansik.

    BASA: Abang Johari nerima penemuai basa raban ari LUKE ti diketuaika (empat ari kiba) Mari, lalu sama enggau nerima penemuai basa (ari kanan) Wan Lizozman, Len, Manyin, Awang tengah sereta (lima ari kiba) Masing.

    Ba atur pengawa nyain MoU nya, perintah Sarawak diarika Sekretari Mendam Opis Menteri Pemansang Mengeri enggau Pengeraja Asal, Dr. Wan Lizozman Wan Omar lalu besaksika pemangku Direktor Jabatan Hutan Sarawak Hamden Mohamad, lalu LUKE diarika Presiden sereta CEO iya, Mari Walls sereta besaksika Executive Vice President Johanna Buchert.

    Sempekat nya disain pengudah penemuai deligit Sarawak ti diketuaika Kepala Menteri ke menua Finland dalam bulan September 2017.

    LUKE ngembuan latar belakang ti tegap dalam sustainable forestry baka dalam chara inventori kampung, nyimpan gis rumah gadung enggau isu ubah iklim dunya.

    Nengah MoU nya, pakar deka matau tauka ngiga chara ngenegap tauka ngeringka kerejasamam nengah pansik begulai enggau aktiviti pemansang sereta ke bukai.

    Kerejasama kededua piak deka ngemeranka inovasi enggau chara ngurus pengeraja asal ti mampan dikena betapi enggau ubah iklim, pengawa ngalau biodiversiti, pengelikun pemakai, ai enggau energy.

    Sama bisi datai ngemataka pengawa nyain MoU nya Sapit Kepala Menteri ti mega Menteri Pemansang Mengeri enggau pengeraja Asal II Datuk Amar Awang Tengah Ali Hasan, Sapit Kepala Menteri ti mega Menteri Pemansang Infrastruktur enggau perengka Penangkut Tan Sri Datuk Amar James Jemut Masing, Menteri Pelajar, Sains enggau Pansik Teknologi Dato Sri michael Manyin Jawong sereta Menteri Muda Perambu Mengeri, Pengatur Tanah enggau Rampa Menua datu Len Talif Salleh sereta ke bukai. #UtusanBorneo

    No comments

    Post Top Ad