Header Ads

  • Berita Tebaru

    Perintah seruran meri pemerat ngagai orang indu, ku Fatimah

    Dato Sri Fatimah Abdullah
    Berindik ari nya JWKS udah nyediaka kus pengelandik nengah WWTC.

    KUCHING: Taun 2018 nyadi ‘Taun Ngenegapka Orang Indu’, baka ke udah dipadah Menteri Besai, Datuk Seri Najib Tun Razak lebuh mantaika Bajet 2018, maya bulan November 2017.

    Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madahka tu tanda perintah seruran betatika orang indu, lalu ketegal nya mega, Opis Orang Indu enggau Ruang Bilik Sarawak (JWKS) betatika pengawa ngelatih  orang indu ke bisi pemerat, nengah chara nyendiaka kus pengelandik nengah Palan Pengelandik Wisma Wanita (WWTC).

    “Pekara tu digaga ngambika ulih mantu pengawa perintah sereta nentuka orang indu deka lebih agi besemekih sereta ulih nyukung ekonomi ruang bilik enggau menua.

    “Ngipak enggau pemerat Kepala Menteri Datuk Patinggi Abang Johari Tun Openg, ke deka ngemansangka ekonomi digital nyadi pungkal ngemujurka makit global lalu muka awak ngagai orang dagang, ngemanahka agi pengelandik sida iya, lebuh bejalaika dagang,” ku Fatimah.

    Iya madah munyi nya lebuh bejaku ba atur pengawa Nyain Sempekat Pemreti Ati (MoA) entara JWKS enggau vendor WWTC di Wisma Wanita di Jalai Sultan Tengah ditu,kemari.

    NGARAPKA MAJU: Noriah (kiba) besilih dokumen enggau siku ari vendor ke dipadu ulih JWKS lalu bela dikemata ulih Fatimah (tengah).
    Ba atur pengawa nya, Fatimah meri terima kasih ngagai tiga vendor WWTC ke udah ngaga kus sida iya enggau pelatih dia dalam timpuh 2014-2017 (3 taun). Vendor nya, Palan Latih Krafjari Epal (ngajar kus Bejait Kreatif), YAHOS Schools of Skills (ngajar Kus Berapi), enggau Eafflesia Wellness Sdn Bhd (ngajar kus Spa enggau Urut).

    Vendor ke timpuh 2018-2019, tiga buah kompeni dipadu ulih Opis Pemansang Pengelandik (JPK) lalu ngembuan Skim Latih dual naasional(SLDN) dipilih nengah tender opis nya bejalaika kus WWTC, iya nya SG Akademi Sarawak (ngajar kus Berapi), Palan latih Pengelandik Zurainas (Kus Ngerias Diri), enggau Teratak Kayangan (Kus Spa enggau Urut).

    Ke taun tu, ku iya, JWKS nengah WWTC deka majakka program pengelandik tu enggau chara ngemanahka agi kus nya ari sukut, peresa sebedau enggau pengudah kus; Milih bansa modul latih; Nagit urung 20 persin (%) ari penyereta WWTCngepunka dagang sida iya,; Ngangkatka kualiti Ngajar di WWTC; sereta Ngerijista Kus nengah ‘Online’.

    Sama bisi enggau ngulu atur pengawa nya, Menteri Muda Orang Indu, Ruang Bilik enggau Pemansang Anak Mit, Rosey Yunus, Menteri Muda Pengelantang Pendiau Komuniti, Datuk Francis Harden Hollis enggau Direktor JWKS, Noriah Ahmad. #UtusanBorneo

    No comments

    Post Top Ad