Header Ads

  • Berita Tebaru

    Polisi Tok Nan majak ditampung disempulang polisi KM baru dikena ngemansangka Sarawak

    Datuk Patinggi Abang Johari Tun Openg
    KUCHING: Sehari tu, 13 Januari genap setaun Datuk Patinggi Abang Johari Tun Openg nyadi Kepala Menteri Ke-6, sereta udah bejalaika tanggungpengawa nyadi ketuai Sarawak enggau manah.

    Abang Johari ke nyadi Kepala Menteri nyilih niang Pehin Sri Adenan Satem ti dikelala enggau kanggau ‘Tok Nan’ ke nyadi kepala menteri Ke-5 ti ninggalka dunya kena 11 Januari 2017.

    Kelimpah ari ti neruska polisi Tok Nan, Abang Johari bisi numbuhka sekeda polisi baru ti nyengkaum ekonomi digital, Bank Pemansang Sarawak (DBOS), SarawakPay enggau mayuh agi polisi baru ke bukai.

    Chairman Raban Nembiak Barisan Nasional (BN) Sarawak, Dato Sri Fadillah Yusof madahka polisi baru ti ditumbuhka Kepala Menteri Ke-6, Abang Johari ulih mai Sarawak nyingkang jauh nuju nyadi nengeri maju sereta mujur dalam Malaysia.

    Iya madahka polisi baru ke ditumbuhka kepala menteri nya baka Digital Ekonomi udah narit ari raban nembiak.

    “Dalam timpuh setaun nyadi ketuai, Datuk Patinggi Abang Johari Tun Openg udah bejalaika mayuh pekara ungkup nengeri enggau rayat Sarawak.

    “Kepala Menteri Ke-6 nya udah numbuhka polisi baru dikena ngemajuka nengeri Sarawak nengah chara numbuhka ekonomi digital, ti disambut manah agi raban nembiak.

    “Chara iya endang amat dikearapka ulih mai Sarawak nyingkang jauh agi nuju nengeri maju enggau mujur dalam Malaysia,” ku iya ti mega Menteri Kerja Raya.

    Fadillah meri penerang nya ngarika Raban Nembiak Barisan Nasional (BN) Sarawak enggau Raban Nembiak Parti Pesaka Bumiputera Bersatu (PBB) nyerumba setaun Abang Johari nyadi Kepala Menteri Ke-6.

    “Raban Nembiak (BN Sarawak enggau PBB) sekali agi nandu ‘ikrar’ deka terus meri sukung tegap enggau deka mantu YAB Kepala Menteri nyadika Sarawak endur ke chukup manah endur semua orang,” ku iya.

    Kelimpah ari nya iya mega madahka Abang Johari neruska polisi enggau semaya ke udah  dipejalaika Kepala Menteri Ke-5 niang Pehin Sri Adenan Satem.

    “Iya ke nyadi ‘Kapten baru Tim Tok Nan’ udah neruska semua polisi enggau semaya ti digaga niang Pehin Sri Adenan Satem maya Pengawa Bepilih Nengeri Ke-11 (PRK11) nyengkaum berundingka enggau perintah besai pasal minta pulai baru hak Sarawak.

    “Nambahka nya perintah nengeri ke diiring iya udah nganjung seraban ke London ngambika mansik silik fail enggau hak Sarawak baka ke ditulis dalam Sempekat Malaysia 1963 (MA63) sereta hak nengeri Sarawak maya diperintah perintah Bristish,” ku iya ti sama bisi enggau ngulu aum Kaunsil Besai BN ti diatur ba indu opis PBB ditu, kemari.

    Kelimpah ari nya lebuh ditanya pekara ti sama, Pemangku Presiden PBB Datuk Amar Awang Tengah Ali Hasan madahka, Abang Johari ke nyadi Kepala Menteri ke-6 udah mai Sarawak nyadi lebih proaktif.

    Iya arap bendar polisi ke dibai kepala menteri nya mantu narit ati mayuh agi pemeranak puku ari menua luar datai ke nengeri tu lalu beranakka puku ditu.

    “Kepala Menteri kitai (Abang Johari) udah bejalaika mayuh polisi, siti ari nya ekonomi digital.

    “Lalu nama utai ke dipeda tauka digiga pemeranak puku iya nya polisi ‘business friendly’ lalu tu ulih ngenegapka agi poltik,” ku iya ti mega Menteri Industri enggau pemansang Orang Dagang lebuh dikerandau raban pengarang berita.

    Dulu ari nya Awang tengah sama enggau ngulu aum Kaunsil Besai BN. #UtusanBorneo

    No comments

    Post Top Ad