Header Ads

  • Berita Tebaru

    Produk ke bukai ari sawit deka dikemansang

    Datuk Amar Douglas Uggah Embas
    KUCHING: Perintah diatu benung ngiga chara ti pemadu manah dikena ngangkatka produk ke bukai ari sawit awakka enda tinggal ari menua bukai.

    Sapit Kepala Menteri Datuk Amar Douglas Uggah Embas madahka, ba pengawa ngangkatka produk nya nengeri tu tinggal ari menua Sabah.

    Perintah  diatu ku iya benung mansik indu pelin ke ngembuan juluk deka ngemansangka dua hektar tanah di nengeri tu ditanam sawit.

    “Diatu kitai benung ngiga chara dikena ngemansangka produk ke bukai ari sawit, ngangkatka produk ke bukai ari sawit di Sarawak.

    “Laban enti dibandingka enggau Sabah kitai agi di belakang pia mega dalam pemansut produk ke bukai ari sawit,” ku iya ti mega Menteri Betanam Betupi Moden, Tanah adat enggau Pemansang Kandang Menua lebuh dikerandau raban pengarang berita.

    Dulu ari nya Uggah ngarika Kepala Menteri Datuk Patinggi Abang Johari Tun Openg bejadika 3rd International Biohealth Science Conference (IBSC) 2018 ke diatur Institut Perubatan dan Pergigian Termaju (IPPT) Universiti Sains Malaysia (USM) ba sebuah hotel ditu, kemari.

    Berebak enggau tu lebuh dipinta ngenang pasal Kesatuan Eropah (EU), Uggah madahka nya berita ti enda manah ngagai orang ke nanam sawit, nyengkaum di Sarawak.

    Iya madahka perintah nengeri enda lantang ati ngagai pemutus ke digaga EU laban nya meri empas enda manah ngagai pekebun mit sawit di Sarawak.

    Ku iya, pengawa ngurangka bekal nya ulih ngeruga rega sereta pemutus EU nya ti enda ngemendarka ngena sawit dalam biofuel mega ulih ngeruga asil pemansut menua.

    Nitihka ripot Reuters kena 18 Januari, EU beperambu enda ngemendarka biofuel bepelasarka sawit berengkah 2021.

    Malaysia pengeluar minyak sawit kedua pemadu besai di dunya pengudah Indonesia lalu kededua menua tu nyendiaka urung 90 peratus ari pemansut dunya.

    Beduduk ari pekara nyadi nya, Uggah minta penanam sawit di a Sarawak kelebih agi pekebun mit diperansang ngemayuhka aktiviti ekonomi dikena nambahka penatai pemisi baka nupi kambin, chapi enggau manyi.

    “Ngelama tu aku suah udah nyebut ngambika pekebun enda bepanggai ngagai sebengkah utai tanam aja tang patut ngemayuhka aktiviti ekonomi.

    “Nya kebuah bisi ubah dalam polisi perintah nengeri, ke alai kitai meri subsidi ngagai ruang bilik ti nanam lebih ari sebansa utai tanam dikena mantu sida ke bisi dua tauka tiga penatai pemisi.

    Pekebun mit sawit ku iya,tau mekuh ngagai nanam kulat sereta ulih nupi kambin enggau chapi ngambika nyema rega komoditi nurun, utai bukai ulih mantu.

    Perintah mega meransang pekebun di nengeri tu ngambi nanam buah baka rian, rambutan tauka nenas kelimpah ari sawit.

    “Nya mih strategi ke patut dipejalaika ngambika enda ditebus orang ti semina ngira diri sereta nguji nyaga diri ari pekara ti dikerinduka kitai,” ku iya. #UtusanBorneo

    No comments

    Post Top Ad