Header Ads

  • Berita Tebaru

    Program CIP dikearapka ulih diatur ninting taun, ku Len

    Datu Len Talif Salleh
    Program nya deka meri penguntung ngagai graduet biak kelebih agi ti ngambi pelajar bekaul enggau bidang nya.

    KUCHING: Sarawak Forestry dikearapka ulih ngatur ‘Program Latihan Pemuliharaan (CIP)’ nyadi program ninting taun, ke disadang meri penguntung ngagai graduet biak kelebih agi ti ngambi pelajar bekaul enggau bidang nya.

    Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka program nya dipegulaika enggau elemen ti diguna baka penemu pasal biodiversiti enggau industri kayu di Sarawak.

    Nambahka nya dalam program nya mega bisi negu elemen penemu undang-undang enggau polisi sereta pengelandik ngatur operasyen kampung enggau ke bukai.

    “Aku ngarapka Sarawak Forestry deka ngatur CIP tu ninting taun sereta ngarapka program tu ulih meri penguntung ngagai orang biak kelebih agi ti bisi komitmen tauka langgur deka mujur ba kereja dalam bidang tu.

    “Kitai patut ngaku inisiatif CIP ulih ngenataika penguntung, lalu bisi peminta ba pemayuh ke dilatih pasal ngintu.

    “Aku arap bendar enggau raban keterubah CIP tu, nya deka muka mata industri sereta ngarapka mayuh agi ngambi bagi ba pengawa ngalau enggau nyaga rampa menua,” ku iya seraya meri penemu ngambika ukai semina dibuka ngagai nembiak ke ngambi bidang nya aja.

    Len mansutka pekara nya lebuh bejaku ba pengawa nyuaka setipikit ‘Program Latihan Pemulihan’ ngagai 15 iku pelatih keterubah ke diatur Sarawak Forestry ba sebuah hotel ditu, kemari.

    KE PENGINGAT: (Belakang, tengah) Len begambar enggau pelatih keterubah CIP. Sama bisi (belakang, tiga kanan) Zolkipli enggau (belakang, dua kiba) Dr. Peter sereta ke bukai.
    Berebak enggau tu iya ngarapka pelatih CIP ulih nambahka penemu enggau pengelandik Ngatur Pengawa Ungkup Timpuh Ke Panjai enggau nyaga kampung sereta patut temegah ngagai penyulut keterubah sereta bisi komitmen nuju pengawa nyadi ‘Duta Pemuliharaan’

    Lebuh ditanya sekalika bisi raban kedua CIP, nitihku Pemangku Ketuai Pemesai Eksekutif Sarawak Forestry Zolkipli Mohamad Aton madahka pekara nya benung diatur.

    Pelatih keterubah CIP berengkah belatih 3 April 2017 sereta tembu kena 31 Disember 2017

    “Dipelabaka raban kedua CIP engka ulih berengkah bulan April taun tu,” ku iya.

    Ku Zolkipli, dalam timpuh semilan bulan nya pelatih belajarka 8 modul dikena ngenukuka semua ke pemadu manah aja ke ulih nyereta program sereta betapi enggau pemar ke nyata.

    Iya madahka program nya dipejalaika perintah enggau kerejasama ari pengemeran industri.

    “Kitai beterima kasih ngagai Gerempung Kayu Ramu Sarawak (STA) ti ngarika industri kayu ramu, UNIMAS, UPM, WWF enggau WCS ti nyendiaka licha enggau endur belatih,” ku iya.

    Sama bisi datai be pengerami nya Menijar Besai STA Dr Peter Kho enggau ke bukai. #UtusanBorneo

    No comments

    Post Top Ad