Program CSR patut mekuhka ngagai sekula ti begunaka bantu -->
Cari Berita

Advertisement

Program CSR patut mekuhka ngagai sekula ti begunaka bantu

Admin | beritaiban@gmail.com
January 25, 2018

Datuk Seri Tiong King Sing
Ngambika ulih nangkup peminta perintah sereta ulih nyaup nempa pemansang modal mensia ti menyana di menua tu.

BINTULU: Kompeni,gempung korporat sereta institusyen wang diperansang ngemayuhka agi program tanggungpengawa rama korporat (CSR) mantu sekula tauka raban ti begunaka bantu di nengeri tu.

Kaban Parlimen (MP) Bintulu, Datuk Seri Tiong King Sing madahka di menua tu mayuh kompeni, gempung korporat nyengkaum institusyen wang tang raban nya diperati agi jrang bejalaika program ke bansa nya.

Nya kebuah iya meransang sida nya nangkup peminta perintah mantu raban begunaka bantu sereta gawaka pemansang modal mensia kelebih agi ngagai komuniti menua pesisir.

“Bantu mata duit patut diubah ngagai bantu barang tauka perengka sekula baka pekayan sekula, kasut tauka kereban tulis ngagai bala nembiak ti begunaka bantu nya,” ku Tiong.

Iya mansutka jaku nya lebuh bejadika Program Bantu Sekula, Tuisyen Rayat enggau Bantu Tasah Bah Yayasan Bank Rakyat di Sekula Primari (SK) Labang, Sebauh kemari.

Sama bisi datai Pemesai Pengatur Pengawa Opis Pelilih Sebauh, Baithy Tini; Menijar Wang Yayasan Bank Rakyat, Mohd Hafiz Sulaiman; Menijar Pampang Bank Rakyat Bintulu,

Abdul Azis Rosli; Chairman Kaunsil Kepala Pengajar Sebauh ke lalu nyadi Kepala Pengajar SK Labang, Roslan Rosli, bala pemesai kanan OPis Pelajar Pelilih Bintulu, Opis Pelajar Pelilih Sebauh enggau Opis Pelajar Pelilih Tatau.

Dulu agi ari nya, bisi 300 iku nembiak ari lapan buah sekula primari datai ari SK Bukit Mawang (19), SK Sungai Genaan (16), SK Hermanus Assan (36), SK Kuala Binyo (26),

SK Kuala Kebulu (33), SK Kuala Sigu (17), SK Pandan (75) enggau SK Labang (78) nerima bantu sekula, mata duit penyampau RM100 siku ari Yayasan Bank Rakyat.

Seraya 10 buah sekula primari iya nya SK Sebauh, SK Bukit Balai, SK Kuala Tatau, SK Sangan Iban, SK Bintulu, SK Jepak, SK Kidurong 2, SK Tatau, SK Pandan enggau SK

Labang nerima bantu Tuisyen Rayat enggau kelai iya ngaul pengawa nyuaka replika chek.

Kelimpah ari tujuh rumah panjai enggau sebuah genturung pendiau bela nerima bantu tasah bah iya nya barang pemakai baka berau, minyak makai, gula enggau ke bukai.

ALBUM: Bala penerima Program Bantu Sekula, Tuisyen Rayat enggau Bantu Tasah Bah Yayasan Bank Rakyat begambar begulai enggau Tiong (duduk tengah) sereta raban pengatur enggau bala bukai.

Penerima bantu tu datai ari Rumah (Rh) Ding Sandai Sungai Penyuan Tubau (38 ruang bilik), Rh Janggu Kasah Sungai Tebila Tubau (12 ruang bilik), Rh Unji Pagan Sungai

Tissay Ulu Sebauh (20 ruang bilik), Rh Nyipa Tingang Kuala Pandan Sebauh (63 ruang bilik), Rh Edau Dali Nanga Marak Sungai Binyo (9 ruang bilik), Kampung Labang (55 ruang bilik) sereta Rh Indang Abok Sungai Selagoi Labang (11 ruang bilik). #UtusanBorneo