Header Ads

  • Berita Tebaru

    Projek dalam sitak Parlimen Santubong 90 peratus udah tembu, ku Wan Junaidi

    Dato Sri Wan Junaidi Tuanku Jaafar
    KUCHING: Pemansang projek ke digaga dalam timpuh dua taun ke udah ba sitak Parlimen Santubong dipelabaka udah manggai lebih 90 peratus udah dipejalaika.

    Menteri Pengeraja Asal enggau Rampa Menua ti mega Kaban Parlimen Santubong , Dato Sri Wan Junaidi Tuanku Jaafar madahka diri temegah ati ngagai Opis Kereja Raya (JKR), Opis Parit enggau Entali Ai  (JPS) sereta Opis Menteri Pemansang Menua Pesisir enggau Kandang Mengeri (KKLW) laban ke udah manah bejalaika projek nya.

    Nitih ku iya, penyampau semua ungkus projek ke dipejalaika JPS ba sitak parlimen nya urung lebih RM80 juta, lalu pia mega projek ke dipejalaika JKR kurang lebih enggau nya (JPS).

    “Ari penyampau semua projek pemansang ke dipejalaika dalam sitak parlimen Santubong, aku meda nyauka urung lebih 90 peratus projek nya udah dipejalaika.

    “Aku temegah ati laban nadai projek ti dipadahka ‘puntan’dalam sitak dipegai aku.

    “Tu mih tuju aku deka mendingka licha ari JKR, JPS enggau KKLW, laban deka nemu pemansang projek dalam sitak aku ba taun 2016, 2017 sereta ti dipelabaka ke deka tembu ba taun 2019,” ku iya bejaku enggau raban pengarang berita.

    Dulu ari nya Wan Junaidi mendingka licha bekaul enggau pemansang projek ti dipejalaika JKR, JPS enggau KKLW ba sitak Parlimen Santubong, ke diatur ba Bilik Aum JKR Bagi Menua Kuching ditu, kemari.

    Ku iya, nya berita manah ungkup taun 2016 enggau 2017, lalu laluh projek deka digaga dalam taun 2018, bedau tembu ketegal proses tinda, teknikal enggau ke bukai tang benung dipejalaika sereta enda tinggal di belakang.

    Projek pemansang ke dipejalaika JKR dalam sitak parlimen nya nyengkaum projek surau, masjid, jalai alun. jeti, klinik enggau ke bukau, lalu projek DID baka ngaga benteng, ngemanahka tikas parit dikena nyeliah ampuh ngenyit enggau ke bukai.

    Nitih ku iya, dalam sitak iya mayuh sungai ke alai bisi 85 projek mit sungai baka meresi sungai, ngenalamka sungai, ngelasi sungai nagmbika enda alit enggau ke bukai ti begunaka belanja urung RM6.9 juta.

    Berebak enggau tu, iya madahka projek ke bedau dipejalaika diatu iya nya nyambung jalai alun ngagai urung tujuh buah genturung pendiau ke diuan pupu bansa baka Iban, Melayu sereta China, ti dipejalaika KKLW.

    Ku iya projek ke beungkus urung RM45 juta nya mungkur tujuh buah genturung pendiau iya nya Kampung Semilang enggau Beradek, Sungai Pinang , Tiang Api sereta ngagai Kampung Beliung.

    “Projek jalai alun tu udah langkar ke penudi. Kebuah lubah laban mayuh utai diubah nitihka peneka peranak genturung pendiau ti enda setuju enggau langkar digaga opis menteri.

    “Semina tinggal nya laban ti mayuh peminta ari peranak endur nya, kelimpah ari bisi projek bukai baru dilangkar. Enti enda  pia, projek dalam sitak aku ulih dipejalaika JKR enggau DID urung 100 peratus dalam taun 2017 enggau 2016,” ku iya.

    Sama bisi ba aum pengarang berita nya kemari, Injinir Bagi Menua, JKR Kuching Awang Mohammad Fadillah Awang Redzuan enggau Jurutera JPS Bagi Menua Kuching/Samarahan, Irwandee Reduan. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: