Header Ads

  • Berita Tebaru

    Prosedur projek ungkup sekula patut dipereti

    Datuk Joseph Salang
    Pejah ngumbai MP Julau enda nyaup ngemansangka sekula engka ketegal sida enda nemu pasal prosedur nya.

    JULAU: Kaban Parlimen (MP) Julau Datuk Joseph Salang ningkah jaku ke dibantai ba laman rama ti madahka iya enda nyaup ngemansangka sekula ba parlimen nya baik nya beberika belanja tauka pemansang fizikal.

    Iya madah, orang ti mantaika jaku nya nyangka enda nemu tauka meretika prosedur ke patut dititih sentang atur pengawa numbuhka pemansang fizikal di sekula.

    “Bisi prosedur ti udah ditentuka meseti dititih enti deka ngaga pemansang fizikal di sekula lalu tu ukai ba baruh kuasa aku.

    “Projek pemansang di sekula meseti nengah Opis Pelajar pia mega ari Menteri Opis Pelajar,” pia ku iya madah.

    Salang mantaika jaku tu maya merarau begulai enggau lebih 30 iku pengajar di Julau, kemari.

    Iya madah, iya endang sereta semampai nyaup sekula ba parlimen nya tang enti ba pekara numbuhka pemansang fizikal nya ukai ari kuasa iya ke nyadi pengari rayat.

    Tang iya madah, laban ke nyadi Chairman Kaunsil Penyanding Penemu 1Malaysia Sarawak, iya mega bisi numbuhka projek ba sekula ke dipilih ukai semina nyaup ngemansangka pelajar nembiak tang mega bisi ngaga projek bekal ai beresi.

    “Ba pekara beberika belanja, kenyau ke nyadi pengari rayat ba Parlimen tu 18 taun ke udah aku semampai nyua insentif pelajar ngagai nembiak ngambika sida ransing agi belajar,” ku iya nimbal.

    Berebak enggau pengawa nya, Salang sekali agi minta bala apai indai nembiak bekempit enggau sekula semak agi.

    “Enti apai indai kering begulai enggau sekula tu mega deka mai pemanah ngagai pelajar anak sida.

    “Penguntung ari ulah begulai tauka bekerejasama enggau sekula tu ulih dipeda kitai di Julau ditu alai pemutus peresa sereta tikas penyulut ba lumba enggau main nembiak ditu majak manah.

    “Julau sebengah ari pelilih nengeri tu ti dipadahka ngerikod penyampau apai indai ti pemadu mayuh ngulu program ke diatur sekula,” pia ku iya madah.

    Pemesai Opis Pelajar Pelilih Julau Dali Rain ba jaku iya ngarapka Salang mengkang nandu pengeransing nyaup piak sida ngemujurka pengawa.

    Nangkan ke tu, Salang bisi meri insentif ari iya empu ngagai siku nembiak ari SK Pakan ti udah mujur ba peresa taun siti suba.

    Insentif RM1,000 nya disuaka iya nengah Dali. #UtusanBorneo

    No comments

    Post Top Ad