PRS ngarapka PM ngemendarka pengari chalun indu maya PRU14 -->
Cari Berita

Advertisement

PRS ngarapka PM ngemendarka pengari chalun indu maya PRU14

Admin | beritaiban@gmail.com
January 25, 2018

Tan Sri Datuk Amar James Jemut Masing
KUCHING: Parti Rakyat Sarawak (PRS) endang ngarapka Menteri Besai (PM) ti mega Chairman Barisan Nasional (BN) Datuk Seri Najib Tun Razak mutuska bisi chalun indu ngarika parti nya ba Pengawa Bepilih Besai Ke-14 (PRU 14) tu ila.

Presiden parti nya, Tan Sri Datuk Amar James Jemut Masing madahka, nya setipak enggau juluk menteri besai tauka perintah deka ke 30 peratus orang indu dalam perintah.

Lebuh ditanya bekaul enggau chalun indu, sekali agi iya madahka dalam lis chalun ke dianjung ngagai chairman BN endang bisi nama chalun indu laban deka ngamatka jaku meri kuasa tauka peluang ngagai orang indu ngaga pemutus.

“Bisi (chalun indu). Laban PM madahka kitai deka meri kuasa ngagai orang indu. Nya meh ke dipejalaika kami (PRS), kami deka ngerejaka pekara ti dipadahka iya.

“Kitai ngarapka iya (PM) ulih meretika pekara tu laban nya ke dipadahka iya. Apin lama iya bisi nyebut pasal 30 peratus orang indu diberi kuasa dalam ngaga pemutus renggat atas,” ku iya lebuh dikerandau raban pengarang berita.

Dulu ari nya, Masing bisi ngulu ‘Loadout Ceremony of E6DP-A Substructure and Topsides’ ke diatur Sarawak Shell Berhad enggau Brooke Dockyard and Engineering Works Corporation (BDEWC) ba BDEWC Sejingkat Fabrication Yard ditu, kemari.

‘Loadout Ceremony of E6DP-A Substructure and Topsides’ udah mujur dipenyadika Kepala Menteri Datuk Patinggi Abang Johari Tun Openg.

Ditanya baru pemayuh nama chalun indu PRS, iya madahka;”Enda mayuh, tang bisi chalun indu (PRU 14),” ku iya ti enggai madahka nama ke dianjung nyadi chalun.

Berebak enggau tu Masing madahka PRS udah nyikap diri tauka besedia dalam semua pekara dikena napi PRU14.

Ba PRU sebedau tu PRS diungkupka enam sitak parlimen iya nya Parlimen Julau ti dipenggi Datuk Joseph Salang Gandum; Sri Aman (Datuk Masir Kujat); Selangau (Datuk Joseph Entulu Belaun); Lubok Antu (Datuk William Nyakau Badak); Kanowit (Datuk Aaron Ago Dagang) enggau sitak Parlimen Hulu Rajang dipenggi Datuk Wilson Ugak Kumbong.

Kelimpah ari nya lebuh ditanya bekaul enggau Larry Sng ti madahka diri deka bediri minta pilih ba sitak Parlimen Julau, Masing madahka, nya nadai bekaul enggau parti.

“Larry nadai kaul enggau aku laban iya ukai kaban parti, nya alai aku enggai bejakuka pasal iya.

“Larry tauka barang sapa ulih bediri tang ukai ngena tiket PRS laban ukai kaban parti. Nya alai aku madah kes ditutup,” ku iya seraya madahka Larry enda ngeruga penegap parti nya ba PRU14. #UtusanBorneo