PRU14: Belaban chara manah, anang bejai pangan diri - Berita Iban Online

Header Ads

  • Baru Nyadi

    PRU14: Belaban chara manah, anang bejai pangan diri

    Datuk Joseph Salang Gandum
    Anang ngena chara ti enda manah baka bejai tauka ngena politik duit ketegal deka ngangkatka diri empu.

    JULAU: Taja bisi orang bukai bela ngining bediri ba penuduk Parlimen Julau maya Pengawa Bepilih Besai Ke-14 (PRU14) tu tang Kaban Parlimen Julau ke diatu, Datuk Joseph Salang Gandum ngasaika pekara nya enda ngeruga penuduk iya.

    Taja pan baka nya, iya minta sida ke deka nyadi chalun anang ngena chara ti enda manah baka bejai iya tauka ngena politik duit ketegal deka ngangkatka diri empu.

    “Padah sereta terang enggau nyemetak ngagai bala pengundi ditu nama pemadas enggau pengelandik diri empu ngambika rayat empu ulih mida tauka nemu kediri empu sapa kita,” pia ku iya madah maya pengerami begulai enggau rayat ba Rumah Gundai Kat, Tubai Buah Ulu ditu, kemari.

    Iya bejaku ngenang pengeransing siku raban Kaunsil Besai Parti Rayat Sarawak (PRS) ti mega siku orang dagang di Julau iya nya Nyempah Sabot.

    Nyempah, injinir ba industri minyak enggau gis, udah berengkah bejalai ngayanka diri ngulihka sukung ari bala tuai rumah ba sekeda rumah panjai di Parlimen Julau.

    Kelimpah ari Nyempah, ex-Kaban Kunsil Nengeri (ADUN) Pelagus, Larry Sng Wei Shien ari Kapit mega ngayanka diri bela bisi ati ngining bediri deka penuduk nya.

    Larry disaup apai iya ti mega ex-Kaban Parlimen Julau Datuk Sng Chee Hua udah belabuh bejalai niki rumah panjai.

    “Aku enda ulih nagang sida tu ti deka bediri laban menua kitai ngemeranka adat demokrasi.

    “Tang ulah sida tau nejuka penyerakup rayat pambar, nyau enggai bepeda pangan diri nyentuk bisi mega alah ketegal politik duit,” ku iya madah baru.

    Salang madah, nama iya udah dibantaika PRS ngetanka penuduk Parlimen Julau lalu bedau diubah naka ke diatu tauka nyentuk maya hari ngantung nama bepilih ila.

    “Nama-nama utai ulih nyadi, kita nyangka dipilih nyadi chalun lalu maya nya anang ngira sapa penyukung aku.

    “Nyangka sida ila enda besetujuka kita nyadi chalun maya nya,” pia ku iya.

    Nambahka nya, iya madahka diri enggai amat nyaup orang ti sengaja nempa cherita enda amat sentang pengawa iya nyadi pengari rayat dia.

    Bekaul enggau Nyempah ti dipadahka deka nganti iya sebedau tu, Salang ti mega Sekretari Besai PRS madah, enti nunda Nyempah patut besabar dulu.

    “Aku enda ngemulaka semaya aku deka diganti enti maya aku udah badu.

    “Sebedau aku badu, Presiden PRS Tan Sri Dr James Masing empu bisi empat kali madahka aku ngetanka penuduk tu maya pengerami begulai enggau rayat,” ku iya nerang.

    Ku iya, Nyempah ti nyadi Sapit Chairman PRS pampang Pakan patut meri sukung dulu maya tu.

    “Tang iya milih jalai enda ngibuhka aku tang terang nguji ngelaban aku maya Aum Tiga Taun Sekali (TDC) di Bintulu,” pia ku iya.

    Ku Salang, Nyempah patut begulai enggau iya baru lalu ngayanka diri ngagai rayat ngambika rayat belabuh nemu sapa iya.

    Bekaul enggau Larry Sng ku iya, Larry bisi ayan dia nganti iya laban ‘diasuh’ sekeda pemesai Barisan Nasional (BN) lalu tu berita baru ba iya tauka PRS.

    “Nyangka Larry patut berandau enggau Masing dulu.

    “Semua orang nemu iya enggau apai iya sebedau tu dibuai parti ketegal ningkah undang-undang parti,” ku iya sambil madah ulah Larry ke bebansa China ti madahka diri chalun ke pemadu manah ba penuduk nya nyelai laban dia majoriti pengundi bansa Iban.

    Di Parlimen Julau ku iya, mayuh orang bukai ti ngembuan pelajar ke tinggi.

    Semaya Larry ti numbuh Turu Pelajar dikena nyaup nembiak nampung pelajar dia, ku Salang, pengawa iya ti nyaup nembiak ba pelajar ba menua nya endang udah dikemeranka iya kenyau ari 18 taun ke udah tang enda diterantang.

    Ku iya, tu enda nyengkaum saup keterubah iya ngagai nembiak maya ke ditemu mujur nampung pelajar ngagai palan pelajar tinggi.

    Larry udah numbuhka Turu Pelajar ba DUN Pelagus maya ke agi nyadi ADUN dia suba.

    KAMI AGI NYUKUNG SALANG: Bala tuai rumah enggau sida ke nyukung PRS mandangka diri ngandalka Salang (empat kiba, duduk belakang) mengkang bediri ba Parlimen Julau maya PRU14 tu.

    Ba pekara bekaul, maya pengerami nya, lebih 20 iku tuai rumah datai ngelai diri nyukung Salang ngetanka penuduk Parlimen Julau maya PRU14 ti deka datai.

    Maya tu mega iya bisi nerima lebih 50 iti peminta nyadi raban PRS ke disua TR Gundai Kat ngagai iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads