Header Ads

  • Berita Tebaru

    PTRBM mantah perambu muka Ladang Sawit Bakong ngati kediri

    Alexander Asing Sadai
    MIRI: Serakup Tuai Rumah Beluru Marudi (PTRBM) mantah perambu muka Ladang Sawit Bakong (BPOM) ngati kediri, diperambu Gempung Raban Bumai Sarawak di Sungai Laong, Beluru di Marudi ketegal bisi kebuah ke patut.

    Sekretari Politik Kepala Menteri, Alexander Asing Sadai ti ngarika serakup nya madahka perambu muka ladang nya diperati ukai semina mangka sida ke diau dia, tang mega rampa menua.

    “Kami ngansak raban bekuasa bekaul bebasa ngambi berundingk sereya beratika perambu nya lalu dikearap projek nya enda deka terus dipejalai laban iya mega ukai ekonomi ke ulih mansang.

    “Kitai beratika perambu ladang ngatika diri enggau nadai pemesai ke patut nanam sawit dikena nyukung ladang, nadai ngemai mayuh penguntung ekonomi ngagai bala komuniti ke disebut sereta komuniti ke bukai,” ku Alexander ba sebengkah penerang berita ditu, apin lama ke udah.

    Alexander nyemetak madahka pekebun mit sawit chukup diintu ari penyampau ladang ke bisi sereta bala operator di dalam enggau ngelinggi kandang menua Bakong.

    KAMI MANTAH : Alexander (duduk tengah) begulai enggau bala kaban Serakup Tuai Rumah Beluru Marudi mantah perambu muka ladang sawit ngatika diri ari PPNS di kandang Sungai Laong, Beluru, Marudi rambau aum pengarang berita, apin lama ke udah.
    PTRBM beratika BPOM semina deka meri penguntung ngagai sekeda piak ti nyata ayan dalam agih ekuiti perambu ke alai PPNS deka megai 30 peratus saham, Gempung Orang Bumai Nasional (Nafas) 20 peratus saham, bala kaban Gerempung Orang Bumai Sital Baram (PPK Baram) 10 peratus seraya DD Plantation Sdn Bhd ti diempu Yee Ming Sing megai 40 peratus saham, ku Alexander.

    “Kami endang nadai pengandal bala kaban PPK Baram ulih nyungkak manggai 10 peratus saham kelimpah nadai ulih megai atur pengawa enggau operasyen ladang.

    “Ke diatu, iya pekara diperatika kami ke alai perambu projek dibantaika PPNS di kandang menua Bakong iya nya nadai bekaul,” ku iya.

    Ku Alexander, prinsip ba pengawa mantah perambu numbuhka BPOM nyengkaum peranak ari mayuh bengkah rumah panjai ti besemak enggau ladang ke diperambu enda diterang sereta dipadah memanah pasal perambu ngaga ladang nya.

    “Nyadi raban ke bisi kaul, kami endang beratka pekara tu ke tau ngasuh charut ari pengawa ngaga ladang nya.

    “Kami sedar atur pekara ba Pangka Pansik Rampa Menua enggau Rama (SEIA) enggau Pengatur Perambu Rampa Menua (EMP) nadai dipejalai nitihka pematut.

    “Pekara nyelai ba pejalai perambu projek enggau atur pengawa endang berat laban iya ngaul ke bukai, atur pengawa ba pekara dipelaba sereta nguji pengulih rampa menua sereta pangka ram aba projek ke diperambu, udah nya ngelangkar mitigasyen ti engkeman, atur pengawa sereta pengawa matau,” ku Alexander.

    Ari taba ladang di kandang menua dikelingi mayuh bengkah rumah panjai enda dikeruga sebarang teda rachun ke dibuai ladang ngagai sungai enggau ai endang ulih ngasuh rampa menua kamah sereta pengelantang rama, ku iya nandu.

    “Sungai endang sereta agi nyadi pemansut ai irup sereta utai idup ngagai komuniti menua pesisir tu. Endang deka bisi pangka terus ba Sungai Laong ti bepati ba Ulu Sungai Bakong, beberapa kilometer ke ulu iya nya alir pemansut ai ngagai palan pemeresi ai Kaunsil Ai Sitak Utara (Laku).

    “Tu palan meresi ai ti meri bekal ai beresi ngagai pelilih Beluru, Pelilih Subis sereta mega ngagai serata mengeri Miri,” ku iya nambah. #UtusanBorneo

    No comments

    Post Top Ad