Header Ads

  • Berita Tebaru

    Raban biak saru runding enggau gaya politik diatu, ku SPR

    Tan Sri Mohd Hashim Abdullah
    KUCHING: Gaya politik ke diatu mayuh ngeruga ulah enggau runding orang biak ngerejista diri nyadi pengundi sereta nurun ngundi.

    Chairman Komiti Pengawa Bepilih (SPR) Tan Sri Mohd Hashim Abdullah madah, ulah enggau runding pengundi diatu enda ulih dipelaba kelebih agi enti bepanggai ngagai gaya politik ke diatu.

    Nitih ku iya, kenyau Februari 2017 SPR chakah bejalaika Program Pelajar Pengundi ba Institut Pelajar Tinggi (IPT) lalu nengah program nya bepelasarka pansik ti dipejalaika tetemuka mayuh kebuah orang biak enggai ngerejista diri nyadi pengundi.

    “Keterubah, kurang penyedar sereta enda nemu pemesai guna ngerejista sereta ngundi ti ngujungka sida enda ibuh enggau enda bejalaika tanggunpengawa nya.

    “Kedua, sekeda ari sida madahka diri nadai ati deka maruk diri dalam politik sereta deka agi mantaika asai ati nengah media rama tauka nyereta gempuru bebala mayuh.

    “Lalu bisi mega ke nyaut nadai ati tauka enda rinduka gaya politik diatu ti majak charut sereta ngemingungka sida,” ku iya.

    Ku Hashim madahka ngagai Utusan Borneo, naka ke diatu nengah Program Pelajar Pengundi, urung 30,000 iku orang biak udah dikerandau sereta diberi licha pasal pemesai guna ngerejista enggau ngundi.

    Iya madahka bisi mega sekeda orang nya madahka diri enda nemu chara ngerejista diri nyadi nyadi pengundi kelimpah ari ti nganggap nya pengawa dipejalaika SPR.

    “Kebuah ketiga, agi bisi mega ke enda nemu baka ni chara ngerejista lalu ngumbai nya ukai pekara ti beguna.

    “Keempat, bisi mega ti nganggap sida iya terus direjista SPR  nengah chara automatik lebuh manggai ba umur 21 taun lalu enda ibuh ngerejista diri.

    “Ke bendar rejista nya semina digaga SPR nengah peminta orang sesiku,” ku Hashim madah ngagai Utusan Borneo.

    Apin lama, media ngeripot pansik beberapa piak bekaul iya nya tebal agi orang biak nadai ati ngerejista nyadi pengundi laban nganggap nya enda beguna, ku iya.

    Lalu 70 peratus responden ti dikerandau sida enggai ngerejista laban enggai maruk diri dalam pekara politik sereta saru runding enggau gaya politik diatu.

    “Kitai irau enti fenomena tu ulih ngeruga ulah sida ke biak maya PRU ila,” ku iya.

    Bepelasarka Rejista Nama Pengundi nyentuk Suku Tahun Ketiga 2017, tebal agi pengundi dalam urung umur 40 ngagai 49 taun iya nya urung 273,000 iku tauka 22 peratus ari semua pengundi di nengeri tu.

    Udah nya ditangkan pengundi ti beumur 30 ngagai 39 taun ti mungkur 256,000 iku orang tauka 21 peratus ari penyampau semua pengundi berejista di Sarawak, ku iya.

    Enti dibagi ngagai renggat umur ku iya,  bisi 12.6 peratus pengundi ti beumur 21 - 29 taun, sereta 30 - 39 taun (21.2 peratus); 40 -49 taun (22.6 peratus); 50 - 59 taun (20.6 peratus); 60 - 69 peratus (13.7 peratus); 70 - 79 taun (6.4 peratus); 80 - 89 taun (2.2 peratus) enggau ke beumur 90 taun ke atas bisi 0.7 peratus. #UtusanBorneo

    No comments

    Post Top Ad