Header Ads

  • Berita Tebaru

    Raban nembiak dilalau nyikap diri ngena penemu teknologi digital

    Tun Pehin Sri Abdul Taib Mahmud
    KUCHING: Raban nembiak di nengeri tu dilalau nyikap diri ngena penemu sereta pengelandik dalam teknologi digital, dikena ngerebut mayuh peluang ke bisi disediaka perintah nyengkaum ba pengawa dagang.

    TuaI Megai Menua (TYT) Sarawak Tun Pehin Sri Abdul Taib Mahmud madah, laban diatu jeman digital sereta patut ulih ngubah chara idup enggau gawa awakka ulih mansang sereta napi pemar jeman digital.

    “Ekonomi Digital nyendiaka mayuh peluang ngagai raban biak kitai ke bejalaika pengawa dagang.

    “Aku arap bendar nembiak kitai iya nya raban ti kreatif sereta inovasyen setipak enggau peminta guna jeman digital sereta ulih nempa nama dalam bidang ke dikemeranka diri empu ba renggat antarabansa.

    “Aku ngelalau raban biak kitai ngerebut peluang ti bisi disediaka perintah nengah pengawa nyikap diri ngena penemu enggau pengelandik dalam teknologi digital,” ku iya.

    Tun Taib mansutka pekara nya lebuh bejaku ba Gempuru Khas Aum Ketiga Penggal Kedua Kunsil Nengeri (DUN) Sarawak Ke-18 Beserimbai enggau Penumbuh Ke-150 Kunsil Nengeri Negeri Sarawak, ti diatur ba Kompleks Kunsil Nengeri Sarawak ditu, kemari.

    Berebak enggau tu Tun Taib madahka Sarawak deka majak teulihka penyulut besai agi ari baruh iring Kepala Menteri Datuk Patinggi Abang Johari Tun Openg sereta raban kabinet iya.

    Iya pechaya, pengelandik pemesai ke ngiring nengeri nengah inisiatif pemansang ke dipejalaika, Sarawak ulih tejapaika status nengeri maju enggau bepenatai pemisi lebuh manggai ba taun 2030.

    “Komitmen perintah ti beratka rayat dalam perambu pemansang iya, chara ti chukup beguna dikena ngelangkar landskap ekonomi ti progresif enggau pengetan.

    “Aku pechaya ekonomi diatu deka betapi enggau penambah mega nengah inisiatif Ekonomi Digital ti meri dimensi baru ngagai aktiviti ekonomi Nengeri Sarawak.

    “Inisiatif tu ngayanka iring YAB Kepala Menteri ti bisi juluk ke jauh sereta nemu ubah ekonomi dunya kemaya hari tu,” ku iya seraya madahka Sarawak diatu ba pelasar ke betul.

    Nya alai ku iya, semua piak beterima kasih sereta nyukung inisiatif ti dipejalaika perintah ngambika meri penguntung ngagai semua kitai.

    Chara baru pemansang Nengeri ti ditumbuhka Abang Johari baka Bank Pemansang Sarawak (DBOS), Petroleum Sarawak Berhad (PETROS) enggau Sarawak Multimedia Authority (SMA) deka terus nyadi penegap pemansang enggau penumbuh ekonomi nengeri, ku Tun Taib.

    “Aku mega gaga ati laban iring YAB Kepala Menteri ti majak negika hak enggau pemerat Sarawak dalam konteks Sempekat Malaysia 1963 (MA63) enggau hak eksklusif bekaul enggau ngaga garis entara ba tasik enggau pengeraja asal kitai,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: